ဧပြီ၊၃
ကချင်ပြည်နယ်၊ တရုတ်နယ်စပ်၊ ကံပိုင်တည်မြို့ အထက်တန်းကျောင်းမှာ ကျောင်းဆရာ/မ မလုံလောက်တဲ့အတွက် ပဉ္စမတန်း(၅)တန်း(မူလတန်းအဆင့်) အထိသာ သင်ပေးနိုင်သေးတယ်လို့ ကျောင်းသားမိဘတွေဆီက သိရပါတယ်။
ကံပိုင်တည်မြို့မှာ အထက်တန်းအဆင့်ထိ ကျောင်းအပ်လက်ခံထားပေမဲ့ စာသင်ပေးမယ့် ကျောင်းဆရာ/မ မလုံလောက်တာကြောင့် လက်တလောမှာတော့ ၅ တန်း အထိသာ သင်ပေးနိုင်ပြီး အလယ်တန်းနဲ့ အထက်တန်းအဆင့်တွေကို မသင်ပေးနိုင်သေးဘူးလို့ ကံပိုင်တည်ဒေသခံ အမျိုးသမီးတစ်ဦးက မြစ်ကြီးနားသတင်းဂျာနယ်ကို ပြောပါတယ်။
“ဖွင့်တာတော့ဖွင့်တယ် ဆယ်တန်းအထိ။ ဒါပေမဲ့ ဆရာမ မလောက်လို့ မနက်ဖြန်ကနေတော့ စာသင်မယ်တဲ့။ ဆရာကြီးရောက်လာမှ ဆရာမအကူပေးရောက်လာမယ်တဲ့။ငါးတန်းအထိပဲ သင်ပေးနိုင်သေးတယ်တဲ့။”လို့ အထက်ပါ အမျိုးသမီးက ပြောပါတယ်။
ဒီနှစ်က ကံပိုင်တည်ကျောင်းမှာ မူလတန်းကျောင်းအပ်တဲ့ ကျောင်းသူ/သားတွေ အရင်ကနှစ်ထက်များပြီး ဝိုင်းမော်ဘက်က ကျောင်းသူ/သားတွေလည်း လာတက်ကြတယ်လို့လည်း သိရပါတယ်။
ကံပိုင်တည်က ကျောင်းသူ/သားအချို့ကို ကျောင်းသားမိဘတွေက ဝိုင်းမော်ဘက် ကျောင်းအပ်ထားကြပေမဲ့ တိုက်ပွဲတွေကြောင့် ကျောင်းတွေ ပိတ်ထားရပြီး စောင့်ကြည့်နေကြရတယ်လို့လည်း သိရပါတယ်။
ကံပိုင်တည်မြို့ရဲ့ ရာသီဥတုအခြေအနေနဲ့ ကုန်စျေးနှုန်းအခြေအနေတွေကြောင့် ကျောင်းဆရာမတွေ ကျောင်းပြောင်းလျှောက်ကြတာ များတယ်လို့လည်း နောက်ထပ် ကံပိုင်တည်ဒေသခံ အမျိုးသမီးတစ်ဦးက မြစ်ကြီးနား သတင်းဂျာနယ်ကို ပြောပါတယ်။
“ ရတဲ့လစာက နည်း၊ အသုံးစရိတ်ကအရမ်းများတယ် ကုန်ဈေးနှုန်းအရမ်းတက်တော့ ဘယ်သူမှ မနေနိုင်ဘူး။ တချို့ကအပူပိုင်းဒေသဘက်က လာတဲ့သူတွေကလည်း အရမ်းအေးတော့ မနေနိုင်ကြလို့ ကျောင်းပြောင်းလျှောက်ကြတာများတယ်။”လို့ အထက်ပါ အမျိုးသမီးက ပြောပါတယ်။
ကံပိုင်တည်မြို့မှာ စစ်တပ်က အာဏာသိမ်းပြီးနောက်ပိုင်း ကျောင်းဆရာ/ဆရာမအချို့ CDM လုပ်သွားကြတဲ့အပြင် ပညာရေးစနစ်ကလည်း မကောင်းလာတဲ့အတွက် တချို့က မြို့ပေါ်ကျောင်းတွေကို ပြောင်းရွှေ့သွားကြတယ်လို့လည်း သိရပါတယ်။
