မတ်၊ ၁၃
တိုက်ပွဲတွေကြောင့် ရွှေ့ပြောင်းနေရတဲ့ ဝိုင်းမော်-လိုင်ဇာလမ်း၊ အောင်မြေ(၁) စစ်ရှောင်စခန်းက ပြည်သူအယောက် ၆၀၀ လောက်ဟာ သောက်သုံးရေ၊အစားအစာနဲ့ ဆေးဝါးတွေ လိုအပ်နေကြတယ်လို့ သိရပါတယ်။
လတ်တလောမှာတော့ စစ်ရှောင်တွေဟာ ဝိုင်းမော်မြို့နယ်အတွင်းက နောင်းဟီးနဲ့ စန်းကားကျေးရွာမှာရှိတဲ့ ကချင်နှစ်ခြင်းခရစ်ယာန် (KBC) ဘုရားကျောင်းဝင်းမှာ ခိုလှုံနေကြတာဖြစ်တယ်လို့ စစ်ရှောင်စခန်းနေ တာဝန်ရှိသူတစ်ဦးက ပြောပါတယ်။
“လောလောဆယ်ကတော့ ရေ၊ အစားအစာ အဓိက အဲဒါဟုတ်တယ်။ နေရာကတော့ ဆန့်သလောက်၊ ဆန့်သလို နေနေကြတယ်။”လို့ ဆိုပါတယ်။
လက်ရှိမှာတော့ အသင်းတော်ကပဲ လိုအပ်တာတွေနဲ့ လတ်တလော စားရေး၊ သောက်ရေးကို ကူညီဖြေရှင်းပေးကြပြီး နေရာထိုင်ခင်းတွေလည်း စီမံဆောင်ရွက်ပေးထားတယ်လို့ ဆက်လက်ပြောပါတယ်။
စစ်ရှောင်တွေ သောက်သုံးဖို့အတွက် ရေဘုံဘိုင်တစ်ခုတူးပေးဖို့ လူမှုဝန်ထမ်းခြင်းနှင့် ဖွံ့ဖြိုးရေးဌာန (KBC – HDD) ကနေ လုပ်ဆောင်နေကြပြီလို့လည်း သိရပါတယ်။
လက်ရှိအချိန်မှာတော့ စစ်ရှောင်တွေနေထိုင်ဖို့ နေရာထိုင်ခင်းတွေလည်း လုံလောက်မှုမရှိတာ ဖြစ်တဲ့အတွက် အဆောင်တွေ လိုနေသေးတယ်လို့လည်း သိရပါတယ်။
လက်ရှိ နောင်းဟီးနဲ့စန်းကားကျေးရွာက ဘုရားကျောင်းမှာ ခိုလှုံနေကြတဲ့ ပြည်သူတွေဟာ နမ်ဆန်ယန်၊ ဒဘတ်ယန်၊ ရွှေညောင်ပင် နဲ့ အောင်မြေ(၁) စတဲ့ကျေးရွာက စစ်ရှောင်ပြည်သူတွေ ဖြစ်ကြပါတယ်။
ကဇူးယန်နဲ့ ဂါးရာယန်ကျေးရွာက စစ်ရှောင်ပြည်သူတွေကတော့ မိုင်းနားနဲ့ မြစ်ကြီးနားမြို့က စစ်ရှောင်စခန်းဘက်မှာ သွားရောက်ခိုလှုံနေကြတယ်လို့ သိရပါတယ်။
နမ်ဆန်ယန်ကျေးရွာက ပြည်သူတွေကတော့ မနှစ် ဇူလိုင် ၃ ရက်နေ့မှာ ရွာအတွင်း စစ်ကောင်စီတပ်ကနေ ထိုးစစ်ဆင်တိုက်ခိုက်မှုကြောင့် ကြိုတင်ထွက်ပြေးတိမ်းရှောင်လာ
သူတွေဖြစ်ပြီး ကျန်ကျေးရွာနေ ပြည်သူတွေကတော့ မနှစ်က ဒီဇင်ဘာလ တတိယပတ်လောက်က ရွာအတွင်း တိုက်ပွဲပြင်းထန်လာတာကြောင့် တိမ်းရှောင်ခဲ့ကြသူတွေ ဖြစ်ပါတယ်။
အဲဒီကျေးရွာက ဒေသခံတွေဟာ မိမိရဲ့ နေရပ်ဒေသကို စွန့်ခွာပြီး အောင်မြေ (၁) ကျေးရွာမှာ စစ်ရှောင်စခန်းတစ်ခုဖွင့်လှစ်ပြီးတော့ ခတ္တတိမ်းရှောင်နေကြတဲ့အချိန် မတ်လ ၇ ရက်နေ့က အောင်မြေ ၁ ကျေးရွာမှာ တိုက်ပွဲပြင်းထန်လာတဲ့အတွက် မတ်လ ၉ ရက်နေ့မှာ ထပ်မံတိမ်းရှောင်ခဲ့ရတာပါ။
အဲဒါကြောင့် စစ်ရှောင်ပြည်သူတွေဟာ လက်ရှိခိုလှုံနေကြတဲ့ နောင်းဟီးနဲ့ စန်းကားကျေးရွာက ကချင်နှစ်ခြင်းခရစ်ယာန် (KBC) ဘုရားကျောင်းကနေ ထပ်မံတိမ်းရှောင်ရမှာကို စိုးရိမ်နေကြတယ်လို့လည်း ဆိုပါတယ်။
“အခုအချိန်က သိတဲ့အတိုင်း၊ ဘယ်နေရာမဆို ဒီမှာဟုတ်ပြီဆိုပြီး အတိအကျ ပြောနိုင်မယ့် အခြေအနေတော့ မဟုတ်ဘူး။ အဲဒါကြောင့် ကျွန်တော်တို့က အမြဲတမ်း ရွှေ့ပြောင်းနေတယ်။ အချိန်ပြည့် ဘယ်ဘက် မျက်နှာမူသွားမယ်၊ ဒီမှာဖြစ်ရင် ဟိုဘက်၊ ဟိုမှာဖြစ်ရင် ဒီဘက်၊ အဲဒီအခြေအနေ ဟုတ်တယ်။”လို့ ဆိုပါတယ်။
အထက်ပါ အောင်မြေ ၁ ကျေးရွာနဲ့ ရွှေညောင်ပင်ကျေးရွာ တစ်လျှောက်ဘက်မှာ နှစ်ဖက်တပ် တိုက်ပွဲပြင်းထန်နေဆဲဖြစ်ပြီး စစ်ကောင်စီက လက်နက်ကြီးတွေနဲ့ ဆက်တိုက်ဆိုသလို ပစ်ကူတာတွေရှိနေပါတယ်။
ကချင်လွတ်လပ်ရေးအဖွဲ့အစည်း(KIO/KIA)ဌာနချုပ်ရှိရာ လိုင်ဇာမြို့ အနီးက စစ်ကောင်စီအထိုင် တပ်စခန်းတွေနဲ့ မြစ်ကြီးနား-ဗန်းမော် လမ်းတစ်လျှောက်က စစ်ကောင်စီတပ်စခန်း အချို့ကို KIA ကနေ မတ်လ ၇ ရက်နေ့ မနက်ပိုင်းကနေ တစ်ပြိုင်နက် ထိုးစစ်ဆင်တိုက်ခိုက်ခဲ့ပြီး အထက်ပါ အောင်မြေ ၁ ကျေးရွာနဲ့ အနီးတစ်ဝိုက်ရွာတွေမှာ ဒီကနေ့အထိ တိုက်ပွဲတွေ ပြင်းထန်နေတာပါ။
