မတ်၊၁၃
ကသိုင်းတောင် စစ်ကောင်စီတပ်ခန်းကနေ နန့်မှော် တန်သုံးထောင်စခန်းကို ထွက်ပြေးလာတဲ့ စစ်ကောင်စီတပ်သားတွေဟာ ထပ်မံပြီး စခန်းစွန့်ခွာ ထွက်ပြေးသွားတယ်လို့ သိရပါတယ်။
KIA ကနေ မတ်လ ၁၁ ရက်နေ့က ကသိုင်းတောင်တပ်စခန်းကို သိမ်းပိုက်ခဲ့တဲ့အချိန် စစ်ကောင်စီသားတွေဟာ နန့်မှော် တန်သုံးထောင်စခန်းကို ထွက်ပြေးသွားခဲ့တာ ဖြစ်ပါတယ်။
အဲဒီနောက် အထက်ပါ တန်သုံးထောင် စခန်းကနေလည်း ထပ်မံထွက်ပြေးသွားတဲ့အတွက် ဒီကနေ့ နေ့လယ် ၁၂ နာရီအချိန်မှာ ကချင်လွတ်လပ်ရေးတပ်မတော်(KIA) ပူးပေါင်းတပ်တွေက သွားရောက် သိမ်းပိုက်ခဲ့တယ်လို့ KIAနဲ့ နီးစပ်တဲ့ သတင်းရင်းမြစ်တစ်ဦးက မြစ်ကြီးနားသတင်းဂျာနယ်ကို ပြောပါတယ်။
“အကုန်ထွက်ပြေးသွားတာလေ။ ကြည့်ရတာတော့ ညသန်းခေါင်ထွက်ပြေးသွားတယ် ထင်တယ်။ ဘယ်အချိန် ထွက်ပြေးသွားတာလဲတော့ မသိဘူး။ ဒီမနက် ကျွန်တော်တို့လူတွေ သွားကြည့်တဲ့အချိန် ဘယ်သူမှမရှိတော့ဘူးတဲ့ ၁၂ နာရီမှာ အကုန်သိမ်းလိုက်ပြီ။”လို့ အထက်ပါ အမျိုးသားက ပြောပါတယ်။
လက်ရှိအချိန်မှာတော့ စခန်းစွန့်ခွာထွက်ပြေးသွားတဲ့ တန်သုံးထောင် စစ်ကောင်စီစခန်းကို KIA၊KPDFတွေ ရှာဖွေရှင်းလင်းရေး လုပ်နေတယ်လို့ သိရပါတယ်။
တာမခန် စစ်ကောင်စီစခန်းနဲ့ ကသိုင်းတောင်က စစ်ကောင်စီစခန်းကို KIA၊KPDFတွေ သိမ်းပိုက်ခဲ့တဲ့အတွက် တန်သုံးထောင်က စစ်ကောင်စီတပ်သားတွေကို ထောက်ပို့ဖို့ စခန်းမရှိတောကြောင့် ထွက်ပြေးသွားတာ ဖြစ်နိုင်ကြောင်း နောက်ထပ်ဒေသခံတစ်ဦးရဲ့ ပြောချက်အရ သိရပါတယ်။
မတ်လ ၁၁ ရက်နေ့က ကသိုင်းတောင် စစ်ကောင်စီတပ်စခန်းကို(KIA) ပူးပေါင်းတပ်တွေကနေ သွားရောက်တိုက်ခိုက်တဲ့အချိန် စခန်းစွန့်ခွာ ထွက်ပြေးခဲ့ပြီး ဒုတိယအကြိမ် သိမ်းပိုက်နိုင်ခဲ့ပါတယ်။
ပြီးခဲ့တဲ့ ဖေဖော်ဝါရီလ ၂၆ ရက်နေ့ကလည်း တာမခန်ကျေးရွာမှာရှိတဲ့ စစ်ကောင်စီတပ်စခန်းကို KIA ပူးပေါင်းတပ်ဖွဲ့က သွားရောက်တိုက်ခိုက်ခဲ့ပြီး မတ်လ ၁၀ ရက်နေ့မှာ သိမ်းပိုက်နိုင်ခဲ့တာပါ။
KIA၊KPDF ပူးပေါင်းတပ်တွေ သိမ်းပိုက်ခဲ့တဲ့ ဝှေခါစစ်ကောင်စီတပ်စခန်း၊နန့်မှော် တန်သုံးထောင် စစ်ကောင်စီစခန်းနဲ့ ကသိုင်းတောင်စစ်ကောင်စီစခန်း သုံးခုဟာ ဖားကန့်ဒေသမှာ စစ်ကောင်စီရဲ့ ထောက်တိုင် စခန်းတွေအဖြစ်ရှိခဲ့တာ ဖြစ်ပါတယ်။
