မတ်၊၁၅
စစ်ရေးအခြေအနေ တင်းမာလာကတည်းက နီးစပ်ရာတောတောင်တွေဘက် တိမ်းရှောင်သွားတဲ့ မိုးမောက်မြို့နယ်အတွင်းမှာရှိတဲ့ ကျေးရွာ ၈ ရွာက ဒေသခံပြည်သူတွေ စားဝတ်နေရေးနဲ့ သောက်သုံးရေအခက်အခဲ ကြုံတွေ့နေရတယ်လို့ သိရပါတယ်။
မိုးမောက်မြို့နယ်အတွင်းက ကျေးရွာတွေဖြစ်တဲ့ နွမ်လန့်၊မြို့သစ်၊ကုန်းလော၊ စီဟက်၊ သာလီ စတဲ့ရွာတွေအပါ ကျေးရွာ ၈ ခုလောက်က ဒေသခံတွေဟာ စစ်ရေးအခြေအနေတွေ တင်းမာလာတဲ့အတွက် ပြီးခဲ့တဲ့ ဖေဖော်ဝါရီလကတည်းနေ တိမ်းရှောင်ခဲ့ကြတာ ဖြစ်ပါတယ်။
တောတောင်တွေထဲက ချောင်းနံဘေးနဲ့ သစ်ပင်အောက်၊ ဝါးရုံနားတွေမှာ မိုးကာတဲတွေနဲ့ နေထိုင်နေကြတဲ့သူတွေထဲက တချို့ဟာ တိမ်းရှောင်နေကြတာ တစ်လလောက်ရှိလာပြီ ဖြစ်တဲ့အတွက် ယူလာတဲ့ အစားအသောက်တွေကုန်ပြီး ခက်ခဲမှုတွေရှိနေတာလို့ ဒေသခံတစ်ဦးက မြစ်ကြီးနားသတင်းဂျာနယ်ကို ပြောပါတယ်။
“အစားအသောက်လည်း ခက်လာတယ်။ သောက်ရေလည်း ခက်တယ်။ ချိုးရေလည်း ခက်တယ်။ တောဘက်နေတဲ့သူတွေအရမ်းမလွယ်ဘူး။ မီးကမရနဲ့ ပိုခက်ခဲနေတယ်။“ လို့ ဆိုပါတယ်။
လတ်တလောမှာတော့ အစားသောက်အတွက် ချောင်းအတွင်းက ငါးဖမ်းယူစားသောက်တာတွေနဲ့ အဆင်ပြေသလို ဖြေရှင်းနေကြပြီး ရာသီဥတုပူတဲ့အတွက် ဖျားနာတဲ့ ကလေးတွေလည်း ရှိနေတယ်လို့ ဆိုပါတယ်။
ဒါ့အပြင် သောက်သုံးရေရဖို့ အနည်ထိုင်အောင်စောင့်ပြီး သုံးနေရတဲ့ အခြေအနေတွေနဲ့ ကြုံတွေ့နေရသလို တိမ်းရှောင်နေတဲ့ဘက် လျှပ်စစ်မီးရဖို့ ခက်ခဲတာအပြင် ဖုန်းလိုင်းအဆက်အသွယ်လည်း ခက်ခဲတယ်လို့ ပြောပါတယ်။
လက်ရှိ တောတောင်ဘက်တွေမှာ တိမ်းရှောင်နေတဲ့ဒေသခံ ထောင်ဂဏန်းရှိပြီး လတ်တလောအခြေအနေကြောင့် ကျေးရွာဘက် ပြန်ဖို့လည်း အဆင်မပြေသေးဘူးလို့ ဆိုပါတယ်။
စစ်ကောင်စီတပ်စခန်းတွေကို KIA က ထိုးစစ်ဆင်တိုက်ခိုက်မှု မရှိခင်ကတည်းက တိမ်းရှောင်သွားကြတာဖြစ်ပြီး တိုက်ပွဲတွေ တစ်ပြိုင်နက်ဖြစ်ပွားလာတဲ့ မတ်လ ၇ ရက်နေ့နောက်ပိုင်းကနေတော့ လက်ရှိအချိန်အထိ မြစ်ကြီးနား-ဗန်းမော် လမ်းတစ်လျှောက်မှာ နှစ်ဖက် စစ်ရေးတင်းမာနေဆဲ ဖြစ်ပါတယ်။
