ဩဂုတ်၊၇
ဖားကန့်မြို့နယ်၊ ဆယ်ဇင်းကျေးရွာအနီး ပန်ချယ်ကွင်းအလွန်က နန့်ကသာချောင်း ရှမ်းနီနယ်မြေဘက်မှာ ကချင်လွတ်လပ်ရေးတပ်မတော်(KIA) နဲ့ ရှမ်းနီအမျိုးသားများတပ်မတာ် (SNA)တို့ တိုက်ပွဲဖြစ်ပွားနေတယ်လို့ ဒေသခံတွေရဲ့ ပြောကြားချက်အရ သိရပါတယ်။
SNA တပ်တွေရှိတဲ့ နေရာဘက်ကို KIAနဲ့ PDF ပူးပေါင်းတပ်တွေက သွားရောက်တိုက်ခိုက်ပြီး တိုက်ပွဲဖြစ်ပွားနေတာလို့ ဒေသခံတစ်ဦးက မြစ်ကြီးနားသတင်းဂျာနယ်ကို ပြောပါတယ်။
” လက်နက်ကြီး သုံးလေးကြိမ်မြည်ပြီးမှ သေနတ်အသေးတွေမြည်တာ။ ရင်း ၂၆(KIA) နဲ့ PDF တွေဟုတ်တယ်။ ဆယ်ဇင်းရွာအပြင်ဘက်မှာ ရှမ်းနီတွေရှိတဲ့ဘက် သွားတိုက်ခိုက်တာ။” လို့ ဒေသခံက ဆိုပါတယ်။
ဒီကနေ့မနက် ဆယ်နာရီခွဲလောက်ကတည်းက ဆယ်ဇင်းရွာအနီး ပန်ချယ်ကွင်းဘက်မှာ လက်နက်သံတွေ ကြားနေရတာဖြစ်ပြီး ဒေသခံတွေကတော့ စိုးရိမ်မှုတွေ ရှိနေတယ်လို့ ဆယ်ဇင်း ဒေသခံတစ်ဦးက အခုလိုပြောပါတယ်။
” ကျွန်တော်တို့က ဝေးတော့ လက်နက်ငယ်က မကြားရဘူး။ လက်နက်ကြီးသံတော့ တော်တော်စိပ်တယ်။လက်နက်သံက မကြားရတာကြာပြီ။” လို့ ဒေသခံက ဆိုပါတယ်။
ဒါ့အပြင် ဒီကနေ့ မနက်ပိုင်းကပဲ ဖားကန့်မြို့နယ်၊ နမ့်မှော်- တာမခန်သွားလမ်းပေါ်မှာရှိတဲ့ ကသိုင်းတောင်က စစ်ကောင်စီ တပ်စခန်းကို KIA တပ်မဟာ ၉ လက်အောက်ခံ ၊ တပ်ရင်း ၆ က သွားရောက်တိုက်ခိုက်ခဲ့ပြီး KIA ဘက်က စခန်းသိမ်းပိုက်နိုင်ခဲ့တယ်လို့ သိရပါတယ်။
