အောက်တိုဘာ၊၃
ဖားကန့်ကျောက်စိမ်းတွင်းဒေသ မှော်စီစာကျေးရွာမှာ ဒီကမနက် ၉ နာရီဝန်းကျင်လောက် ကျောက်စိမ်းလုပ်ကွက်ကမ်းပါး ပြိုကျတာကြောင့်အမျိုးသားတစ်ဦး သေဆုံးသွားတယ်လို့ ဒေသခံတွေက ပြောပါတယ်။
မှော်စီစာကျေးရွာ သာယာကုန်းက ကျောက်လုပ်ကွက်ကျင်းတစ်ခုမှာ ကမ်းပါးပြိုလာတဲ့အချိန် ကျောက်တူးနေတဲ့ အမျိုးသားနှစ်ဦးကို မြေစာထိမှန်ခဲ့ပြီးတော့ တစ်ဦးသေဆုံးသွားတယ်လို့ မှော်စီစာဒေသခံ အမျိုးသားတစ်ဦးက မြစ်ကြီးနားသတင်းဂျာနယ်ကို ပြောပါတယ်။
“ရေမဆေးသမားတွေ တူးထားတဲ့အရာကနေ ကျောက်ကြောကျိုးကျလာပြီး အဲဒီမှာတူးနေတဲ့ တစ်ယောက်က သေတယ်။ တစ်ယောက်က ဆေးရုံရောက်တယ်။”လို့ အထက်ပါအမျိုးသားက ပြောပါတယ် ။
ထိခိုက်ဒဏ်ရာရှိခဲ့သူကတော့ အပြင်ထိခိုက်ဒဏ်ရာ မတွေ့ရပေမဲ့ အတွင်းကြေပုံစံဖြစ်နေတယ်လို့ ဆိုပါတယ်။
လက်ရှိအချိန် ဖားကန့်ဒေသမှာ စားဝတ်နေးအတွက် အရာရာခက်ခဲနေတာကြောင့် ရေမဆေးကျောက်ရှာသူတွေအနေနဲ့ ကျောက်ကြော(ကျောက်စမ်းတူးဖော်နိုင်သည့် မြေကြော) လိုက်လံရှာဖွေတူးဖော်နေရပြီး အခုလို အဖြစ်တွေနဲ့ ကြုံတွေ့ရတာလို့ နောက်ထပ်မှော်စီစာဒေသခံ အမျိုးသားတစ်ဦးက မြစ်ကြီးနား သတင်းဂျာနယ်ကို ပြောပါတယ်။
“အခုအချိန်လူတွေက ခက်ခဲနေကြတာဆိုတော့ လောဘကလည်းကြီးတော့ အခုလိုဖြစ်ကြတာပေါ့။ အပေါ်ကိုလည်းမကြည့် ကျောက်ကြောတွေကိုမက်ပြီး တူးနေကြတာ။”လို့ အထက်ပါ အမျိုးသားက ပြောပါတယ်။
မိုးတွင်းကာလလည်း ဖြစ်တာကြောင့် ဖားကန့်ဒေသက ကျောက်စိမ်းတူးဖော်လုပ်ကွက်တွေမှာ မကြာခဏ မြေစာပုံပြိုပြီး ရေမဆေးကျောက်ရှာတဲ့သူတွေနဲ့ ကုမ္ပဏီဝန်ထမ်းတွေ ထိခိုက်သေဆုံးတာတွေ ရှိနေတာဖြစ်ပါတယ်။
ဖားကန့်ဒေသဟာ မြန်မာနိုင်ငံအတွင်း ကမ္ဘာကျော်ကျောက်စိမ်း ထွက်ရှိရာနေရာဖြစ်ပြီး ၂၀၁၁ ခုနှစ်နောက်ပိုင်း ဟင်းလင်းဖွင့်တူးလာပြီးနောက် ကျောက်စိမ်းကမ်းပါးပြိုကျတာ၊ မြေစာပုံပြိုတာ၊ နွံကန်ပေါက်ကျတာတွေဖြစ်ပွားနေပြီး နှစ်စဉ် လူဦးရေရာနဲ့ချီ သေဆုံးနေရတာပါ။
