ဩဂုတ်၊ ၁၆
ကချင်ပြည်နယ်အစပ် မော်ဟန်ကျေးရွာထဲကို ဒီကနေ့မနက် (၆) နာရီလောက်က စစ်ကောင်စီစစ်ကြောင်း ဝင်ရောက်လာတာကြောင့် တိုက်ပွဲဖြစ်ပွားလာမှာကို ဒေသခံတွေ စိုးရိမ်နေကြပြီး ဒေသခံတချို့က တိမ်းရှောင်ဖို့အတွက် အထုပ်အပိုးတွေ ပြင်ဆင်ထားကြတယ်လို့ သိရပါတယ်။
ဒီကနေ့ မနက်အစောပိုင်းမှာ စစ်ကောင်စီစစ်ကြောင်း ဝင်ရောက်လာပြီး တစ်ရွာလုံး စစ်သားတွေ ဖြန့်ကျက်ထားတာကြောင့် ဒေသခံပြည်သူတွေ စိုးရိမ်နေကြတာ ဖြစ်တယ်လို့ ဒေသခံတစ်ဦးက မြစ်ကြီးနားသတင်းဂျာနယ်ကို ပြောပါတယ်။
” ကျွန်တော်တို့လည်း အားလုံးကြောက်ပြီး သတိ ရှိရှိနဲ့ နေနေကြရတယ်။ စစ်သားတွေ ဒီမနက်ပိုင်းမှာဆို တစ်ရွာလုံးတောင် စိမ်းသွားတာ လမ်းပေါ်မှာတွေ။ရွာထဲကိုလည်း အရပ်ဝတ်/စားနဲ့ အများကြီးဝင်ခဲ့လို့ အားလုံးကြောက်နေတာ။သူများတွေဆို အထုပ်အပိုးပြင်ပြီး ပြေးဖို့ပဲ စောင့်နေကြတယ်”လို့ ဒေသခံက ဆိုပါတယ်။
မော်ဟန်ကျေးရွာထဲမှာ မော်လူးကျေးရွာ အနီးပတ်ဝန်းကျင်ကကျေးရွာတွေနဲ့ အခြားကျေးရွာတွေက တိုက်ပွဲ ကြောင့် ထွက်ပြေးတိမ်းရှောင်လာရတဲ့ ပြည်သူတွေလည်း ရှိနေတယ်လို့လည်း သိရပါတယ်။
ပုံဟောင်းဖြစ်ပါသည်။
