ဖေဖော်ဝါရီ၊၂၂
မြစ်ကြီးနားမြို့မှာ နိုင်ငံကူးလက်မှတ်(Passport) လာလုပ်တဲ့ ဆယ်ကျော်သက်အရွယ် အမျိုးသမီးနှစ်ဦးကို မြစ်ကြီးနား-ပူတာအိုလမ်းပေါ်မှာ ကချင်လွတ်လပ်ရေးတပ်မတော်(KIA)က ဖမ်းဆီးခေါ်ဆောင်သွားတယ်လို့ ကားသမားတွေရဲ့ ပြောပြချက်အရ သိရပါတယ်။
ပူတာအိုမြို့ ဒေသခံတွေဖြစ်တဲ့ အသက် ၁၉ နှစ်ဝန်းကျင်အရွယ် အထက်ပါ အမျိုးသမီးနှစ်ဦးဟာ မြစ်ကြီးနားမြို့မှာ နိုင်ငံကူးလက်မှတ်ပြုလုပ် ပြီးစီးတာကြောင့် ဖေဖော်ဝါရီလ ၂၀ ရက်နေ့က ပူတာအိုမြို့ဘက်ကို ပြန်တဲ့အချိန် ဇွပ်ခါးရွာအနီးက KIA စစ်ဆေးရေးဂိတ်မှာ ဖမ်းဆီးခံလိုက်ရတာ ဖြစ်တယ်လို့ ကားသမားတစ်ဦးက မြစ်ကြီးနားသတင်းဂျာနယ်ကို အခုလိုပြောပါတယ်။
“စစ်သားစုဆောင်းနေတယ်ဆိုတာ မှန်ပါတယ်။ ကားတိုင်းကကို ဖမ်းတာ။ ဇွပ်ခါးဂိတ်မှာ ဖမ်းတာ။ အကြီးအကျယ် ဖမ်းနေတာ”လို့ ကားသမားက ပြောပါတယ်။
ဖမ်းဆီးခံလိုက်ရတဲ့ အမျိုးသမီးနှစ်ဦးနဲ့ လက်ရှိအချိန်အထိ အဆက်အသွယ် တစ်စုံတစ်ရာ မရရှိသေးတဲ့အတွက် စိုးရိမ်နေရတယ်လို့ ဖမ်းဆီးခံရသူတစ်ဦးရဲ့ မိသားစုဝင်တစ်ဦးက အခုလို ပြောပါတယ်။
” ကလေးနှစ်ယောက်ကို ဖမ်းသွားပြီဆိုပြီး ကာသမားတွေ ဖုန်းဆက်လာကြတာ။ သူတို့နှစ်ယောက်က ထိုင်ဝမ်သွားဖို့ Passport(နိုင်ငံကူးလက်မှတ်)သွားလုပ်ပြီး အပြန်မှာဖြစ်တာ။ လောလောဆယ်တော့ ဘယ်လိုစုံစမ်းရမှန်း မသိဘူးဖြစ်နေတယ်။ အခု အရမ်းစိုးရိမ်တာပေါ့”လို့ ပြောပါတယ်။
ကားသမားတွေကနေ စစ်သားစုဆောင်းရေး ခံလိုက်ရကြောင်း ဖုန်းဆက်အကြောင်းကြားလာပေမဲ့ ဘယ်လက်နက်ကိုင် အဖွဲ့အစည်းဖြစ်တယ်ဆိုတာကိုတော့ သူ့အနေနဲ့ မသိရှိဘူးလို့ ဆိုပါတယ်။
ဒါ့အပြင် အမျိုးသမီးငယ်နှစ်ဦးဟာ အိမ်တွင်းအခက်အခဲကိုယ်စီ ရှိသူတွေ ဖြစ်တဲ့အတွက် ပြန်လွှတ်ပေးစေလိုတယ်လို့လည်း မိသားစုဝင်က ဆက်လက်ပြောပြပါတယ်။
ကားသမားတွေရဲ့ ပြောပြချက်အရတော့ အမျိုးသမီးငယ်နှစ်ဦးကို KIA ကနေ ဖမ်းဆီးခေါ်ဆောင်သွားတာ ဖြစ်တယ်လို့ သိရပြီး ဘယ်လိုအကြောင်းအရင်းကြောင့် ဖမ်းဆီးခေါ်ဆောင်သွားသလဲဆိုတော့ မသိရှိရပါဘူး။
အဲဒီနေ့က အထက်ပါ အမျိုးသမီးနှစ်ဦးနဲ့အတူ အသက် ၁၈ နှစ်နဲ့ ၅၀ ကြား လူတစ်ချို့လည်း ဖမ်းဆီးခံရတယ်လို့ ကြားသိရပေမဲ့ အတည်ပြုနိုင်ခြင်းတော့ မရှိဘူးလို့ အထက်ပါ ကားသမားက ပြောပါတယ်။
အခုလို KIAကနေ တပ်သားသစ် စုဆောင်းရေးတွေ ပြုလုပ်နေတဲ့အတွက် လူငယ်တွေကို ခရီးသည်တင်ဆောင်ဖို့ ခက်ခဲသွားတဲ့အပြင် မိမိကိုယ်တိုင် မလုံခြုံတော့ဘူးလို့ နောက်ထပ်ကားသမားတစ်ဦးကလည်း မြစ်ကြီးနားသတင်းဂျာနယ်ကို ပြောပါတယ်။
“KIAတွေ စစ်သားစုဆောင်းရေး လုပ်နေတယ်။ ဟိုတစ်နေ့ကဆို မိန်းကလေး နှစ်ယောက် ပါသွားတယ်။ လက်မှတ်ရောင်းကတည်းက ဘယ်လို ဖြစ်တယ်ဆိုတာ မိဘတွေကို ပွင့်ပွင့်လင်းလင်း ပြောထားတယ်။ အဓိကက ခရီးသွားတွေကို ဆွဲတာ။ ကိုယ်တိုင်တောင် တာဝန်ယူဖို့ မလွယ်တဲ့အချိန်။ ခက်တော့ ခက်တာပေါ့“လို့ အထက်ပါကားသမားက ပြောပါတယ်။
အဲဒီလို လမ်းခုလတ်မှာ လူငယ်/လူရွယ်တွေကို ဖမ်းဆီးမှုတွေ ရှိနေတဲ့အတွက် ပူတာအိုဒေသဘက် ကားလမ်းနဲ့ ခရီးသွားလိုရင် ခရီးသည်တွေအနေနဲ့ အသင်းတော်တစ်ခုခုက ထောက်ခံစာ ကိုင်ဆောင်သွားတာမျိုး အကြံပြုလိုတဲ့အပြင် အခုလို ဖမ်းဆီးနေတဲ့အတွက် ကားသမားတွေအတွက်ပါ အခက်အခဲ ဖြစ်နေရတယ်လို့လည်း ဆက်လက်ပြောပါတယ်။
“ခရီးသွားတွေကို မခေါ်သွားတာတော့ ကောင်းမယ် ထင်တယ်။ နိုင်ငံရေးအရ ဘယ်လိုကြောင့် ဆိုတာတော့ မပြောတတ်ဘူးပေါ့။ တစ်ချို့က ကျောင်းသွားတက်ပြီး ပြန်လာတာတွေရှိတယ်။ ဆင်းရဲသူတွေလည်း ရှိတယ်။ ကားသမားတွေကလည်း စားဝတ်နေရေးအတွက် ရုန်းကန်နေရတာ။ ခရီးသည် မရှိရင် ခက်ခဲတာပေါ့”လို့ ကားသမားက လက်ရှိ ကြုံတွေ့နေရတဲ့ အခက်အခဲကို ပြောပြပါတယ်။
မြစ်ကြီးနား-ပူတာအိုလမ်းမှာ KIAကနေ တပ်သားသစ်စုဆောင်းနေတယ်ဆိုတဲ့ သတင်းကို ခရီးသည်တွေ ကြားသိပြီးနောက် ခရီးသည် သုံးပုံနှစ်ပုံလောက် လျော့နည်းသွားတယ်လို့ ကားသမားတွေရဲ့ ပြောပြချက်အရ သိရပါတယ်။
ဒါ့အပြင် အဲဒီလမ်းတစ်လျှောက် KIAနဲ့ စစ်ကောင်စီတပ်စခန်းဂိတ် စုစုပေါင်း ၁၀ ခုထက်မနည်းရှိပြီး တချို့ဂိတ်တွေမှာ ကားတွေကို တားဆီးစစ်ဆေးလေ့ရှိတယ်လို့လည်း ထပ်မံသိရှိရပါတယ်။
မြစ်ကြီးနား-ပူတာအို လမ်းမှာ ခရီးသွားပြည်သူတွေကို KIA ဘက်က တပ်သားသစ်စုဆောင်းတယ်လို့ ပြောဆိုနေကြတဲ့အပေါ် ကချင်လွတ်လပ်ရေးအဖွဲ့အစည်း (KIO/KIA)သတင်းနဲ့ပြန်ကြားရေးတာဝန်ခံ ဗိုလ်မှူးကြီးနော်ဘူကို မြစ်ကြီးနားသတင်းဂျာနယ်ကနေ ဆက်သွယ်မေးမြန်းရာမှာတော့ သူ့အနေနဲ့ မသိရှိရသေးကြောင်း ပြန်လည်ဖြေကြားပါတယ်။
