ဧပြီ၊၁
ရာဇသတ်ကြီး ဥပဒေပုဒ်မ ၅၀၅-ကနှင့် ရဇသတ်ကြီး ပုဒ်မ ၁၂၄- က တို့ဖြင့် တရားစွဲဆို ခံထားရသည့် ကချင်ပြည်နယ်တရားလွှတ်တော်မှ အကြီးတန်းစာရေး ဒေါ်ယဉ်ယဉ်ဝင်းအား ထောင်ဒဏ် (၇) နှစ်နှင့် ငွေဒဏ် (၁၀၀၀၀) ချမှတ်ခဲ့ကြောင်း သိရသည်။
ဒေါ်ယဉ်ယဉ်ဝင်းအား ၂၀၂၁ ခုနှစ် ဩဂုတ်လက ရာဇသတ်ကြီးဥပဒေ ပုဒ်မ ၅၀၅-က ဖြင့် ဖမ်းဆီးခဲ့ပြီး မြစ်ကြီးနားမြို့နယ် တရားခုံရုံးတွင် အမှုကြားနာစစ်ဆေးနေချိန် မြစ်ကြီးနားခရိုင် တရားခုံရုံးတွင်လည်း ရာဇသတ်ကြီး ဥပဒေ ပုဒ်မ ၁၂၄-က ဖြင့် ထပ်မံပြီး တရားစွဲဆိုခံခဲ့ရကြောင်း နီးစပ်ရာ အသိုင်းအဝိုင်းမှ သိရသည်။
“စဖမ်းတဲ့အချိန်ကတော့ ၅၀၅-က နဲ့ ဖမ်းပြီး စွဲနေရင်းနဲ့ ၁၂၄-က နဲ့ တစ်ခါ ခရိုင်မှာထပ်စွဲတာ။ အခုက သူ့ကို ၅၀၅-က နဲ့ နှစ်နှစ်ချတယ်။ မြစ်ကြီးနားခရိုင်ကကြတော့ ၁၂၄- က နဲ့ ထောင်ဒဏ် ၅ နှစ်နဲ့ ဒဏ်ငွေ တစ်သောင်းရိုက်တယ်။” ဟု ဒေါ်ယဉ်ယဉ်ဝင်းနှင့် နီးစပ်ရာအသိုင်းအဝိုင်းမှ အမျိုးသမီးတစ်ဦးက မြစ်ကြီးနာသတင်းဂျာနယ်သို့ ပြောသည်။
လက်ရှိအချိန် ယင်းအမှု နှစ်မှုနှင့် ပတ်သက်ပြီး အယူခံဝင်ရန် ပြင်ဆင်ထားပြီဖြစ်ကြောင်း သိရပြီး ဒေါ်ယဉ်ယဉ်ဝင်းသည် စစ်အာဏာသိမ်းပြီးနောက်ပိုင်း အာဏာဖီဆန်ရေး Civil Disobedience Movement(CDM) တွင် ပါဝင်ခဲ့ပြီးနောက် ပြန်လည် တာဝန်ထမ်းဆောင်ချိန်တွင် ဖမ်းဆီးခံခဲ့ရပြီး တရားစွဲဆို ခံခဲ့ရခြင်း ဖြစ်သည်။
