မတ်၊၉
ပူတာအိုမြို့နယ်၊ ဆွမ်ပီယန်ကျေးရွာတွင် ယမန်နေ့ မတ်လ (၈) ရက်နေ့က ပြည်သူများ၏ ဆိုင်ခန်းများကို စစ်ကောင်စီတပ်ဖွဲ့ဝင်များက ဝင်ရောက်ဖျက်ဆီးပြီး ပစ္စည်းများကို ကားဖြင့် စိတ်ကြိုက် သယ်ဆောင်သွားကြောင်း သိရသည်။
စစ်ကောင်စီတပ်သားများက နေအိမ်(၂၀)လုံးထက်မနည်း ဝင်ရောက်ဖျက်ဆီးမှုများ ပြုလုပ်ခဲ့ပြီး ဆိုင်ခန်းအတွင်းရှိ ပစ္စည်းများကို မြစ်ကြီးနားသို့ စိတ်ကြိုက်သယ်ဆောင်သွားကြောင်း ဖြစ်စဉ်ကို သိရှိသူ တစ်ဦးက မြစ်ကြီးနားသတင်းဂျာနယ်သို့ ပြောသည်။
“ဆွမ်ပီယန်ပြည်သူတွေရဲ့ ဈေးဆိုင်ခန်းက ပစ္စည်းတွေကို စစ်သားတွေက ကားနဲ့ကို သယ်ပြီး မြစ်ကြီးနားကို ယူဆင်းသွားတယ်။ ဈေးဆိုင်တွေဆို အကုန်ဝင်ပြီး ယူသွားကြတာ။ အိမ်(၂၀)လောက်ရှိမယ်။ သူတို့ကြိုက်တာ အကုန်ယူသွားကြတာ။ အိမ်တွေဆို ဖျက်ပြီး ဘီယာတွေ ယူသောက်နဲ့။ အဲဒီလို လုပ်နေတာတော့ တစ်ပတ်လောက် ရှိပြီ”ဟု ၎င်းက ပြောသည်။
ဆွမ်ပီယန်ကျေးရွာနေ ပြည်သူများသည် လက်ရှိ ဘေးလွတ်ရာကို ထွက်ပြေးတိမ်းရှောင်နေရပြီး ကျေးရွာအတွင်း ပြန်လည် ဝင်ရောက်နေထိုင်ပါက ပစ်သတ်မည်ဟု စစ်ကောင်စီတပ်သားများက ခြိမ်းခြောက်ပြောဆို ထားကြောင်းလည်း သိရသည်။
ပူတာအိုခရိုင်အတွင်းက လုံရှာယန်၊ ဆွမ်ပီယန်နဲ့ ဖတ်မာ စသည့် ကျေးရွာအနီးတစ်ဝိုက်တွင် မကြာခဏ ပစ်ခတ်သံများ ကြားနေရ သောကြောင့်ဒေသခံပြည်သူ အများစု ထွက်ပြေးတိမ်းရှောင်နေရဆဲ ဖြစ်သည်။
