ဧပြီ- ၆
ဖားကန့်မြို့နယ်၊ ဝါရာဇွပ်ကျေးရွာအတွင်းသို့ ရှဒူးဇွပ် ခလရ (၂၉၇)စစ်ကောင်စီ တပ်စခန်းမှ လက်နက်ကြီးများဖြင့် ပစ်ခတ်ခြင်းကြောင့် ရွာသားများထိတ်လန့်ပြီး ကြောက်ရွံ့နေကြောင်း သိရသည်။
၎င်းလက်နက်ကြီးသည် ယမန်နေ့ည( ၈)နာရီခန့်က ကျေးရွာအတွင်းသို့ ကျရောက်ပေါက်ကွဲခဲ့ခြင်းဖြစ်ပြီး (၄)ကြိမ် ပေါက်ကွဲခဲ့ခြင်းဖြစ်သည်။
ထိုလက်နက်ကြီးများသည် နမ်ဆိုင်ခ (Nam sai Hka) တံတားအောက်၊ နမ်ဆိုင်ချောင်း ရေထဲတွင် ၂ ကြိမ်နှင့် နမ်ဆိုင်ရပ်ကွက်အတွင်းသို့ တစ်ကြိမ်ပေါက်ကွဲခဲ့ခြင်းဖြစ်ကြောင်း ရွာသားတစ်ဦးက မြစ်ကြီးနားသတင်းဂျာနယ်သို့ပြောသည်။
” ရပ်ကွက်အတွင်းပေါက်ကွဲလာတော့ ကြောက် နေကြတာ။ လူမရှိတဲ့ ခြံထဲပေါက်ကွဲခဲ့တာ ထိခိုက်ဒဏ်ရာတော့မရှိဘူး။ နှစ်ဖက်တပ်ကနေ တိုက်ပွဲဖြစ်တာလည်းမဟုတ်ဘဲနဲ့ ရွာအထဲ လက်နက်ကြီးတွေ ပစ်လာတော့ လုံး၀မတရားဘူး” ဟု ပြောသည်။
ဒေသခံရွာသားများသည် ဧပြီလ (၁) ရက်နေ့တွင် KIA မှ ယုဇနကုမ္ပဏီအား မီးရှို့ဖျက်ဆီးသည့် ကိစ္စကြောင့် ရွာအတွင်းသို့ လက်နက်ကြီးများ ပစ်ခြင်းဖြစ်နိုင်ကြောင်း သုံးသပ် နေကြသည်။
