မတ်၊ ၁၃
ရှမ်းမြောက်နယ်မြောက်ပိုင်း၊ နမ့်ခမ်းမြို့နယ်က ဘိန်းစိုက်ခင်းဧက တစ်ထောင်ကျော်ကို ၉ ရက်အတွင်း သွားရောက်ဖျက်ဆီးခဲ့တယ်လို့ တအောင်းအမျိုးသားလွတ်မြောက်ရေး တပ်မတော်(TNLA) က ဓာတ်ပုံနဲ့တကွ သတင်းထုတ်ပြန်လာပါတယ်။
တပ်မဟာ ၁ စစ်ဒေသက နမ့်ခမ်းမြို့ကို TNLA တပ်ဖွဲ့က တိုက်ခိုက်သိမ်းပိုက်လိုက်တဲ့နောက် ဒီနှစ် မတ်လမှာ ဘိန်းစိုက်ခင်း ဖျက်ဆီးရေးလုပ်ငန်းတွေ လုပ်ဆောင်လာတာဖြစ်ပြီး ကျေးရွာပေါင်း ၁၅ ရွာက ဘိန်းစိုက်ခင်း ၁,၁၂၅ ဧကကို မတ်လ ၄ ရက်နေ့ကနေ ၁၂ ရက်နေ့အထိ ၉ ရက်တာအချိန်ယူပြီး သွားရောက်ဖျက်ဆီးခဲ့တာလို့ ဆိုပါတယ်။
အဲဒီဒေသတွေဟာ အရင်က စစ်ကောင်စီလက်အောက်ခံ ပန်ဆေးပြည်သူ့စစ်တွေ ထိန်းချုပ်ခဲ့တဲ့ နေရာဒေသတွေဖြစ်ပြီး နောက်ထပ်လည်း ကျန်ရှိနေသေးတဲ့ ဘိန်းစိုက်ခင်းတွေကို ဆက်လက် ဖျက်ဆီးသွားမှာဖြစ်တယ်လို့ ဆိုထားတာပါ။
တာကွမ့်ကျေးရွာ၊ ရှောက်ကုန်းကန်၊ မန်ပန်း(ထက်၊အောက်)၊ အထက်ဆတန်း၊ ကန်ဖာဖို၊ အောက်ဆတန်း၊ ပန်ဆေး၊ ဆန်ချယ်၊မန်မောင်း၊ မန့်မိုင်၊ လျောက်ပန်းကုန်း၊ ပုံစာတီ၊ ၁၂မိုင် ၊ ပါင်ဝိုနဲ့ မည်ခမ်း စတဲ့ကျေးရွာတွေက ဘိန်းစိုက်ခင်းတွေကို သွားရောက်ဖျက်ဆီးခဲ့တာပါ။
TNLA တပ်ဖွဲ့အနေနဲ့ အဲဒီဒေသမှာ ၂၀၁၇ ခုနှစ်၊ ဖေဖော်ဝါရီလ ၁၇ ရက်နေ့နဲ့ ၂၀၂၀ ခုနှစ် မတ်လ ၁၅ ရက်နေ့တုန်းကလည်း ဘိန်းစိုက်ခင်းတွေကို သွားရောက်ဖျက်ဆီးတာရှိခဲ့ပြီး ဖျက်ဆီးနေစဉ်အတွင်း ပန်ဆေးပြည်သူ့စစ်တပ်ဖွဲ့နဲ့လည်း ရင်ဆိုင်တိုက်ပွဲဖြစ်ပွားခဲ့တယ်လို့ ဆိုထားပါတယ်။
