ဩဂုတ်၊၂
ကချင်ပြည်နယ်၊ မြစ်ကြီးနား-ဆွမ်ပရာဘွမ်လမ်းပေါ်က တီယန်ဇွပ်ကျေးရွာအတွင်းမှာရှိတဲ့ စစ်ကောင်စီတပ်စခန်း သုံးခုကို ကချင်လွတ်လပ်ရေးတပ်မတော်(KIA)ကနေ ဒီကနေ့မနက် ၉နာရီလောက်မှာ အပြီးသိမ်းပိုက်လိုက်ပြီလို့ ကချင်လွတ်လပ်ရေးအဖွဲ့အစည်း (KIO/KIA) ပြန်ကြားရေးတာဝန်ခံ ဗိုလ်မှူးကြီးနော်ဘူက အတည်ပြုပါတယ်။
မနေ့က ဩဂုတ်လ ၁ ရက်နေ့ မနက်ပိုင်းလောက်ကနေစပြီး ကချင်လွတ်လပ်ရေးတပ်မတော်(KIA)တပ်မဟာ ၁ ကနေ တီယန်ဇွပ်ကျေးရွာကစစ်ကောင်စီတပ်စခန်းတွေကို စတင်ထိုးစစ်ဆင်တိုက်ခိုက်ခဲ့ပြီး ဒီကနေ့မနက်မှာတော့ စခန်းသုံးခုစလုံးကို အပြီးသတ်သိမ်းပိုက်နိုင်တာလည်း ဖြစ်ပါတယ်။
“တီယန်ကတပ်စခန်း ဒီကနေ့မနက် ၉ နာရီမှာ အပြီးသိမ်းနိုင်ပြီ။ အဲဒီမှာ တပ်က ၅၈ တစ်ခုတည်းပဲ။ ဒါပေမဲ့ တပ်ဖြန့်ခွဲထားတာ ၃ ခုရှိတာပေါ့။ အားလုံးသိမ်းပြီးပြီ။ “လို့ ဗိုလ်မှူးကြီးနော်ဘူက မြစ်ကြီးနားသတင်းဂျာနယ်ကို ပြောပါတယ်။
အထက်ပါ တပ်စခန်းအားလုံးမှာ စစ်သားအင်အားစုစုပေါင်း ၄၀ လောက်ရှိပြီး လက်ရှိမှာတော့ ထွက်ပြေးသွားတဲ့ စစ်ကောင်စီတပ်သားတွေကို လိုက်လံရှင်းလင်းနေဆဲ ဖြစ်တယ်လို့လည်း ဗိုလ်မှူးကြီးနော်ဘူက ဆက်လက်ပြောပါတယ်။
မြစ်ကြီးနားမြို့နဲ့ မိုင် ၅၀ ကျော်လောက်ဝေးတဲ့ မြစ်ဆုံအထက်ပိုင်းက တီယန်ဇွပ်ကျေးရွာမှာ အိမ်ခြေ ၂၀၀ ကျော်လောက်ရှိပြီး လူဦးရေ တစ်ထောင်၀န်းကျင် နေထိုင်ပါတယ်။
