ဖေဖော်ဝါရီ၊၂၁
ကချင်ပြည်နယ်၊ မိုးမောက်မြို့နယ်၊ ခါနန်ကျေးရွာဘက်သွားလမ်းတွင် စစ်အင်အားတိုးချဲ့လာသည့် စစ်ကောင်စီစစ်ကြောင်း ယနေ့ နေ့လယ်(၁၂)နာရီခန့်က မိုင်းဆွဲ တိုက်ခိုက်ခံရကြောင်း သိရသည်။
ဝဝမ်ကျေးရွာသို့ စစ်အင်အားဖြည့်တင်းရန် လာစဉ် ခါနန်ရပ်ကွက်နှင့် ဝဝမ်ကျေးရွာကြားတွင် မိုင်းဆွဲတိုက်ခိုက်ခံရခြင်း ဖြစ်ကြောင်း ဒေသခံတစ်ဦးက မြစ်ကြီးနားသတင်းဂျာနယ်သို့ ပြောသည်။
“ဒီနေ့ သုံးခါလောက်ခွဲတယ်။ စစ်သားတွေက ရွာနှစ်ခုရဲ့ ကြားမှာ။ (၁၂)နာရီလောက်မှာ ဖြစ်တာ။ သုံးခါ ဆက်တိုက် ဟုတ်တယ်။ ဘယ်သူတွေ ခွဲတာလဲတော့ မသိဘူး။ ဒဏ်ရာရတာတွေလည်း မကြားမိသေးဘူး။ခါနန်၊ ဝဝမ်က လူအချို့တော့ ရှောင်နေကြပြီ။ လက်နက်ငယ် ပစ်သံတော့ မကြားရဘူး။ သတင်းကို နားစွင့်ပြီး နေနေကြရတယ်။”ဟု ၎င်းက ပြောသည်။
မိုင်းဆွဲတိုက်ခိုက်ခံရပြီးနောက် စစ်ကောင်စီတပ်သားများ မိုးမောက်တပ်စခန်းဘက်သို့ ပြန်လှည့်သွားကြောင်းလည်း ဒေသခံက ဆိုသည်။
ဝဝမ်ကျေးရွာအနီးတွင် ဖေဖော်ဝါရီလ(၁၇)ရက်နေ့က ကချင်လွတ်လပ်ရေးတပ်မတော်(KIA)နှင့် စစ်ကောင်စီတပ်တို့ တိုက်ပွဲဖြစ်ပွားခဲ့သောကြောင့် ဒေသခံပြည်သူများ ဘေးလွတ်ရာကို ထွက်ပြေးတိမ်းရှောင်နေရဆဲ ဖြစ်သသည်။
