မတ်၊၂၇
ကချင်ပြည်နယ်၊ နမ္မတီးမြို့၊ ကဆုန့်ကျေးရွာအနီးကချင်လွတ်လပ်ရေးတပ်မတော် (KIA)တပ်မဟာ (၂)အောက် တပ်ရင်း (၁၁) တပ်စွဲနေထိုင်သည့် နေရာအား ယနေ့မနက် (၃)နာရီဝန်းကျင်အချိန် စစ်ကောင်စီဘက်မှ လေယာဥ်ဖြင့် ဗုံးကြဲတိုက်ခိုက်ခဲ့ကြောင်း သိရသည်။
“ဒီမနက်(၃)နာရီလောက် မှာ စစ်တပ်ကကျွန်တော်တို့ စခန်းကိုလေယာဥ်နဲ့လာပစ်သွားတာ။ သူတို့ပစ်တဲ့နေရာက လူမနေတဲ့နေရာဟုတ်တယ်။ရုံးအနေနဲ့အသုံးပြုတဲ့အိမ်တော့ ထိတယ်ထင်တယ်”ဟု သတင်းရင်းမြစ်တစ်ဦးက မြစ်ကြီးနားသတင်းဂျာနယ်သို့ ပြောသည်။
လေယာဉ်ဖြင့်လာရောက်ပစ်ခတ်မှုကြောင့် ထိခိုက် ပျက်စီးမှုကို မြစ်ကြီးနားသတင်းဂျာနယ်က ဆက်လက်စုံစမ်းဆဲဖြစ်သည်။
ယင်းအပြင် မတ်လ (၁၉)ရက်နေ့တွင်လည်း KIA တပ်ရင်း(၁၁) မှ မြစ်ကြီးနားမြို့အထွက် စစ်ကောင်စီစစ်ဆေးရေးဂိတ် (၂၁) မိုင်ဂိတ်ကိုသွားရောက်တိုက်ခိုက်ခဲ့ပြီး ဂိတ်ကိုမီးရှို့ဖျက်ဆီးခဲ့သည်။
