မေ၊၃
ကချင်ပြည်နယ်၊ပူတာအိုမြို့နယ်၊ မန်ဇေအုပ်စု အလက်ဒမ်ကျေးရွာတွင် အခက်အခဲဖြစ်နေသူများအတွက် ဂေဟာ ဆောက်လုပ်နေကြောင်း ပန်းဥယျာဉ် လူမှုကူညီရေးအသင်း ဥက္ကဌ ဦးဒီးတန်ဆီမှ သိရသည်။
ခိုကိုးရာမဲ့ ဘိုးဘွားများ၊ မိဘမဲ့ ကလေးသူငယ်များ နှင့် အခက်အခဲဖြစ်နေသူများ လာရောက် တည်းခိုနိုင်မည် ဖြစ်ပြီး လက်ရှိ ပူတာအိုမြို့နယ် နှင့် မချမ်းဘောမြို့နယ်တွင်း ပန်းဥယျာဉ် လူမှုကူညီရေးအသင်းမှ ကူညီစောင့်ရှောက်ပေးနေသည့် ဘိုးဘွား (၆၀) ခန့်ရှိကြောင်း ဦးဒီးတန်က မြစ်ကြီးနားသတင်းဂျာနယ်သို့ ပြောသည်။
“အရင်တုန်းကတော့ ခိုကိုးရာမဲ့ ဘိုးဘွားတွေကို လစဉ်ပံ့ပိုးနိုင်တယ်။ အခု ဝန်ထမ်းတွေ တစ်ချို့ အားနည်းသွာတော့ ခိုကိုးရာမဲ့ ဘိုးဘွားတွေကို နယ်လှည့် ကွင်းဆင်းပြီးတော့မှ စောင့်ရှောက်တာ လုပ်တော့ ပုံမှန်လုပ်တယ်။ ဒါပေမဲ့ အရင်တုန်းကလို မလုပ်နိုင်တော့ဘူး။ အားနည်းသွားပြီ။ အဲ့တော့ ဂေဟာခြံကိုပဲ ဦးစားပေးလုပ်နေကြပါတယ်။ ” ဟု ဦးဒီးတန်က ဆိုသည်။
ဂေဟာ၏ စားရေးသောက်ရေးနှင့်ပက်သက်ပြီး ဂေဟာထွက် ပစ္စည်းများကိုသာ အဓိကထား အသုံးပြုရန် စပါးစိုက်ပျိုးခြင်း၊ အသီးအနှံစိုက်ပျိုးခြင်းများ ပြုလုပ်နေပြီး ကျန်းမာရေးနှင့် ပက်သက်၍လည်း အခြေခံဆေးဝါး ကျွမ်းကျင်သည့် ပရဟိတ လူငယ်များ ကြည့်ရှု့စောင့်ရှောက်ပေးမည်ဖြစ်ကြောင်းလည်း သိရသည်။
ဂေဟာဆောင် တစ်ဆောင် ဆောက်လုပ်ပြီးစီးသွားပြီဖြစ်သော်လည်း လာရောက်နေထိုင်ရန် မီးအဆင်မပြေမှုများ ရှိနေသောကြောင့် ဆိုလာမီးသီးများကို အကူအညီပေးစေချင်ကြောင်းကိုလည်း ဦးဒီးတန်ကဆိုသည်။
