ဇူလိုင်၊၂၇
ကချင်ပြည်နယ်၊ ပူတာအိုခရိုင်၊ မချမ်းဘော့မြို့နယ်ဘက်မှာ ကျွမ်းကျင်ဆရာဝန်တွေနဲ့ ဆေးဝါးအလုံအလောက်မရှိတာကြောင့် ဆေးရုံသွားရမယ့် အခြေအနေအထိ ဖျားနာလာရင် ဒေသဆေးရုံကိုမသွားဘဲ အခြားဆေးရုံနဲ့ဆေးခန်းတွေကိုသာ သွားရောက်ကုသနေတယ်လို့ သိရပါတယ်။
“အခုအခြေအနေမှာ ဆေးကုသတာကတော့ အရမ်းခက်တယ်လို့ပြောလို့ရတယ်။ ကျွန်တော်တို့ မချမ်းဘော့မြို့ကဆေးရုံကြီးမှာဆိုရင် ကျွမ်းကျင်တဲ့ဆရာဝန်တွေမရှိဘူး၊ သွားကုရင်လည်းဆရာဝန်အဆင့်နဲ့ပဲကုရတာမျိုးတွေပဲဖြစ်နေတော့ ပူတာအိုမြို့ကဆေးရုံကိုသွားပြီး ကုသရတာမျိုးတွေ ရှိနေတယ်”လို့ ဒေသခံတစ်ဦးက မြစ်ကြီးနားသတင်းဂျာနယ်ကို ပြောပါတယ်။
ဒေသခံတွေအနေနဲ့ ပူတာအိုမြို့ဆေးရုံကြီး၊ မချမ်းဘော့မြို့နယ်က စစ်တပ်ဆေးရုံ တွေမှာ ဆေးသွားရောက် ကုသခံယူကြရတဲ့အပြင် MAM (Medical Action Myanmar) NGO အဖွဲ့မှာ အခမဲ့ ဆေးကုသခံယူမှုတွေ ပြုလုပ်နေရတယ်လို့လည်း သိရပါတယ်။
“MAM မှာတော့ အခမဲ့ဟုတ်တယ်။ ဥပမာအနေနဲ့ဆိုရင် တစ်ယောက်က အဆုတ်ရောဂါဖြစ်တယ်၊ ဆေးထုတ်စားရမယ်ဆိုရင် သူတို့က ကိုယ့်ရဲ့သွားလာစရိတ်၊ ဆေးကုသစရိတ်၊ သွားလာတဲ့ ဆီစရိတ်ကအစ ထည့်ပေးတယ်။ ဒါပေမယ့် ကြိုတင်ပြင်ဆင်ရမယ်။ MAM တွေနဲ့ကအဲဒီလိုလုပ်တယ်”လို့လည်း ဒေသခံက ဆိုပါတယ်။
အဲဒီ MAM အဖွဲ့ကတော့ မချမ်းဘော့မြို့နယ်မှာ အုပ်စုခွဲပြီး ဒေသခံတွေကို ဆေးဝါးတွေကို အဓိကထား ပေးကာ ကုသပေးနေတဲ့အဖွဲ့ဖြစ်တယ်လို့လည်း သိရပါတယ်။
