ဩဂုတ်၊၁၈
ကချင်ပြည်နယ်၊ ဖားကန့်မြို့နယ်၊ ဆယ်ဇင်းကျေးရွာ အထက်က နန့်ပုတ်ကျေးရွာကို ရှမ်းနီ (SNA) နဲ့ စစ်ကောင်စီပူးပေါင်းစခန်းက လက်နက်ကြီးနဲ့ ပစ်ခတ်တာကြောင့် အရပ်သားတွေ ထိခိုက်မှုရှိတယ်လို့ သိရပါတယ်။
ဒီကနေ့ ဩဂုတ်လ ၁၈ ရက်နေ့ မနက်ပိုင်း ၁၁ နာရီ လောက်က သံယောဇဉ်ကုန်း(ဒေသအခေါ်အဝေါ်) မှာရှိတဲ့ SNA နဲ့ စစ်ကောင်စီပူးပေါင်းစခန်းကနေ နန့်ပုတ်ကျေးရွာကို လက်နက်ကြီးနဲ့ ၃ ကြိမ် ပစ်ခတ်ခဲ့တာကြောင့် ရွာဈေးအလယ်ကို လက်နက်ကြီးကျည် ကျရောက်ခဲ့ပြီး ပြည်သူ ၇ ဦး ထိခိုက်ဒဏ်ရာရသွားတာဖြစ်တယ်လို့ ဆယ်ဇင်းဒေသခံတစ်ဦးက မြစ်ကြီးနားသတင်းဂျာနယ်ကို ပြောပါတယ်။
“လက်နက်ကြီးနဲ့ ၃ ချက်တိတိလှမ်းပစ်တော့ ကျေးရွာက ပြည်သူတွေပေါ်ကိုထိတယ်။ ရွာထဲတည့်တည့်ကို ကျတာပေါ့။ ပြည်သူချည်းပဲနေတဲ့ရွာပါ။” လို့ ဒေသခံက ဆိုပါတယ်။
လက်နက်ကြီးအမျိုးအစားဝင် ( ၆၀ မမ ) နဲ့ နန့်ပုတ်ကျေးရွာကို ပစ်ခတ်ခဲ့တာကြောင့် အပြစ်မဲ့ပြည်သူ ၇ ဦး ဒဏ်ရာရရှိသွားတယ်လို့ နောက်ထပ် သတင်းရင်းမြစ်တစ်ဦးကလည်း ဆိုပါတယ်။
အဲဒီနန့်ပုတ်ကျေးရွာဟာ ဘယ်အဖွဲ့အစည်း စခန်းမှမရှိဘဲ ပြည်သူလူထုတွေပဲနေတဲ့ ကျေးရွာဖြစ်ပြီးတော့ အရင်ကလည်း စစ်ကောင်စီဘက်က လက်နက်ကြီး ပစ်ခတ်တာတွေ မကြာခဏ ရှိခဲ့တယ်လို့ သိရပါတယ်။
ဩဂုတ်လ ၇ ရက်နေ့က ဆယ်ဇင်းကျေးရွာဘက်မှာရှိတဲ့ ရှမ်းနီ(SNA) စခန်းကို ကချင်လွတ်လပ်ရေးတပ်မတော််(KIA) ကနေ တိုက်ခိုက်သိမ်းပိုက်ခဲ့တဲ့နောက်ပိုင်း စစ်ရေးတင်းမာနေတာလည်း ဖြစ်ပါတယ်။
