မတ်၊၁၂
တိုက်ပွဲတွေကြောင့် ဝိုင်းမာ်မော်-လိုင်ဇာလမ်းပေါ်က အောင်မြေ ၂ ကျေးရွာအတွင်း ပိတ်မိနေတဲ့ အသက် ၈၇ နှစ်အရွယ် အဖွားအိုတစ်ဦးဟာ ဒီကနေ့ည ၆ နာရီလောက်မှာ အသက်ရှူကျပ် သေဆုံးသွားပြီးနောက် ညတွင်းချင်း မြေမြှုပ်သင်္ဂြိုဟ်လိုက်ရတယ်လို့ သိရပါတယ်။
အထက်ပါ အဖွားအိုဟာ အရင်က လူကြီးသဘာဝဖျားနာတာတွေ ရှိပေမဲ့ လက်ရှိတိမ်းရှောင်နေရတဲ့ ဘုန်းကြီးကျောင်းဝင်းအတွင်း ရောက်ရှိချိန်ကစပြီး အသက်ရှူကျပ်တာတွေ မကြာခဏ ဖြစ်ပေါ်ခဲ့ပြီးနောက် သေဆုံးသွားတာလို့ အောင်မြေ ၂ ဒေသခံပြည်သူတစ်ဦးက မြစ်ကြီးနားသတင်းဂျာနယ်ကို အခုလို ပြောပါတယ်။
“အဖွားက အသက်လည်း ကြီးပြီ။ ဒီမှာက လူကလည်းကျပ် လေကောင်းလေသန့်ကလည်း မရဆိုတော့ အသက်ရှူကျပ်နေတာ။ ဆေးကလည်း တိုက်ဖို့မရှိ။ ဖျားနေရင်လည်း ဒီအတိုင်း ကြည့်ပြီး နေခဲ့ရတာပေါ့။ ဒီမှာ ရောက်ကတည်းက ထလည်း မထတော့ဘူး။”လို့ ဆိုပါတယ်။
ဘုန်းကြီးကျောင်းဝင်းအတွင်း လူဦးရေများလွန်းတဲ့အတွက် အဖွားရဲ့ ရုပ်အလောင်း ထားစရာနေရာမရှိတာကြောင့် စစ်ကောင်စီတပ်သားတွေဆီ ခွင့်တောင်းပြီး ညတွင်းချင်း မြေမြှုပ် သင်္ဂြိုဟ်လိုက်ရတာလို့ သိရပါတယ်။
အောင်မြေ ၂ ကျေးရွာဒေသခံတွေအပြင် ရွှေညောင်ပင်ဒေသခံအချို့ ပါဝင်တဲ့ ပြည်သူစုစုပေါင်း ထောင်ဂဏန်းလောက်ဟာ အောင်မြေ ၂ ကျေးရွာ ဘုန်းကြီးကျောင်းဝင်းထဲ စုပေါင်း နေထိုင်နေရပြီး စစ်ကောင်စီဘက်က ထွက်ခွင့်မပြုတာကြောင့် ပိတ်မိနေတာလည်း ဖြစ်ပါတယ်။
လက်ရှိအချိန် ပိတ်မိပြည်သူ အများအပြားဟာ ဖျားနာနေတာအပြင် အစားအသောက်နဲ့ ရေပြတ်လပ်လာတဲ့အတွက် အုပ်ချုပ်ရေးမှူးတွေကနေ စစ်ကောင်စီတပ်သားတွေဆီ ရေခပ်ခွင့်တောင်းပြီးနောက် ဒီကနေ့ညနေပိုင်း ၄ နာရီခွဲလောက်မှာတော့ ရေခပ်ဖို့ အချိန်တစ်နာရီပေးတယ်လို့ ကြားသိရပါတယ်။
“ရေ သောက်ဖို့ရော၊ သုံးဖို့ရော မရှိတော့တာ။ ရေချိုးဖို့ဆို ဝေးသေး။ အိမ်သာလည်း သွားလို့မရ။ အုပ်ချုပ်ရေးမှူးတွေ ခွင့်တောင်းပြီး အချိန်တစ်နာရီပေးတယ်။ ရေခပ်ဖို့ဆိုပြီး။ အပြေးအလွှားသွားကြတာ။ တစ်နာရီတောင် မပြည့်သေးဘူး လက်နက်ကြီးသံပြန်ကြားတော့ ရေတောင် ခပ်မရခဲ့ဘူး”လို့ ဒေသခံက ဆိုပါတယ်။
ကလေးတွေအပြင် အသက်ကြီးသူတွေ ရာဂဏာန်းလောက်ဟာ နှာစေးဖျားနာတာတွေ ဖြစ်ပေါ်နေပြီး ကုသဖို့ ဆေးဝါးမရှိတဲ့ အခြေအနေနဲ့ ကြုံနေရတယ်လို့လည်း သိရပါတယ်။
ကချင်လွတ်လပ်ရေးတပ်မတော်(KIA) ကနေ မတ်လ ၇ ရက်နေ့က မြစ်ကြီးနား-ဗန်းမော်လမ်းတစ်လျှောက်ကို ထိုးစစ်တွေ စတင်ပြီးနောက် မတ်လ ၉ ရက်နေ့ကနေ ဒီကနေ့အထိ အောင်မြေ ၂ ကျေးရွာမှာ တိုက်ပွဲတွေဖြစ်ပွားနေပြီး ဒေသခံတွေ ပိတ်မိနေတာဖြစ်ပါတယ်။
အောင်မြေ ၂ ကျေးရွာကတော့ ဝိုင်းမော်-လိုင်ဇာ လမ်းပေါ်မှာ တည်ရှိတာဖြစ်ပြီး လမ်းတစ်လျှောက် မှာတော့ ဝိုင်းမော်-ခါးရှိ-အင်လေး-အောင်မြေ ၁- အောင်မြေ ၂- ရွှေညောင်ပင်- ဂါးရာယန်- ကဇူးယန်- ဒဘတ်ယန်-ကန်တော်ယန်- နန်ဆန်ယန် စတဲ့ ကျေးရွာတွေ တည်ရှိပြီး KIO လိုင်ဇာဌာနချုပ်ကတော့ နန်ဆန်ယန်ကျေးရွာအနီးမှာ တည်ရှိတာဖြစ်ပါတယ်။
