မတ်၊၁၄
ကချင်ပြည်နယ်၊ ဖားကန့်မြို့နယ်၊ ကာမိုင်းမြို့ပတ်ပတ်လည်မှာ စစ်ကောင်စီတပ်ဘက်က စခန်းချနေရာ ယူလာတဲ့အတွက် တိုက်ပွဲဖြစ်ပွားလာမှာကို စိုးရိမ်ပြီး ထွက်ပြေးတိမ်း ရှောင်လိုတိမ်းရှောင်လိုတဲ့ ဒေသခံပြည်သူတွေကို စစ်ကောင်စီဘက်က ဒီကနေ့မနက် ၈ နာရီလောက်ကနေ မြို့ပြင်ထွက်ခွင့် ခွင့် မပြုတော့ဘူးလို့ သိရပါတယ်။
မိုးကောင်းဘက်ကနေ ကာမိုင်းမြို့အဝင်တစ်နေရာအပြင် အပြင် လဝါးကျေးရွာကနေ ကာမိုင်းမြို့ အဝင်နေရာ၊ ရပ်ကွက် ၁ အလယ်၊ သင်္ချိုင်းအနီးတစ်နေရာ၊ မအူပင်ဘုန်းကြီးကျောင်းအနီး၊ ကောင်ရာကျောင်းရှေ့ စတဲ့နေရာတွေမှာ စစ်ကောင်စီတပ်သား အင်အားအများအပြား နေရာယူထားတယ်လို့ ဒေသခံတွေက ပြောပါတယ်။
အခုလို စစ်ကောင်စီတပ်ဘက်က မြို့ဝန်းကျင်မှာ နေရာယူထားတဲ့အတွက် နှစ်ဖက်တပ်တိုက်ပွဲ ဖြစ်ပွားလာမှာကို စိုးရိမ်ပြီး ထွက်ပြေးတိမ်းရှောင်လိုပေမဲ့ မြို့ဝင်အထွက် ဂိတ်တွေအားလုံး ဖြတ်သန်းသွားလာခွင့် ပိတ်ထားတယ်လို့ ကာမိုင်းဒေသခံပြည်သူတစ်ဦးက မြစ်ကြီးနားသတင်းဂျာနယ်ကို အခုလို ပြောပါတယ်။
“ခုက ထွက်လို့ မရတော့ဘူး။ ဒီကနေ့မနက် အစောပိုင်း ပြေးတဲ့ သူတွေပဲလွတ်တယ်။မိုးကောင်း၊ ဖားကန့်၊ လဝါးသွားတဲ့ လမ်းတွေ ဖြတ်လို့ မရတော့ဘူး။ ခုက ကားတွေလည်း မဖြတ်ခိုင်းဘူး“လို့ ဒေသခံက ပြောပါတယ်။
အထက်ပါ စစ်ကောင်စီဂိတ်စခန်းတွေမှာ မတ်လ ၁၃ ရက်နေ့ကနေစပြီး စစ်ကောင်စီတပ်သား အင်အား ပိုများလာတာတွေ့ရပေမဲ့ ကာမိုင်းမြို့အတွင်း စစ်ကောင်စီတပ်သားအင်အား ဘယ်လောက်ရှိနိုင်လဲဆိုတာကိုတော့ ခန့်မှန်းပြောဆိုဖို့ ခက်တယ်လို့ ဒေသခံတွေက ပြောပါတယ်။
ထွယ်ဆန်ရပ်ကွက်၊ မြစိမ်းရောင်ရပ်ကွက်နဲ့ မြို့ပေါ်ရပ်ကွက်နေ ပြည်သူအချို့ကတော့ တိုက်ပွဲဖြစ်ပွားလာမှာကို စိုးရိမ်တဲ့တာကြောင့် မနေ့က မတ်လ ၁၃ ရက်နေ့ကတည်းက ထွက်ပြေးတိမ်းရှောင်နေကြပြီလို့ ဆိုပါတယ်။
“ရွာမှာ လူကို မနေတော့ဘူး။ သင်္ချိုင်းနားက ဘုန်းကြီးကျောင်း အနီးမှာရော ကတုတ်ကျင်းတွေ တူးနေပြီ စခန်းချဖို့ပေါ့။ စစ်သားတွေ ရွာအကုန် ပတ်ပြီးကို နေရာယူထားကြပြီ“လို့ နောက်ထပ် ကာမိုင်းဒေသခံပြည်သူတစ်ဦးက ဆိုပါတယ်။
ဒါ့အပြင် ကာမိုင်းမြို့တွင်းက တပ်မိသားစုတွေကလည်း မြို့ပြင်ဘက် ပြောင်းရွှေ့နေကြပြီလို့လည်း ဒေသခံတွေရဲ့ ပြောပြချက်အရ သိရပါတယ်။
ဒီကနေ့ မနက်ပိုင်း ၈နာရီလောက်က ထွယ်ဆန်ယန်ဘက်နဲ့ လဝါးလမ်းဆုံဘက် နှစ်နေရာမှာ ကချင်လွတ်လပ်ရေးအဖွဲ့အစည်း(KIA)နဲ့ စစ်ကောင်စီတပ်တို့ ထိတွေ့တိုက်ပွဲဖြစ်ခဲ့ပြီး ကာမိုင်းဗျူဟာကုန်းဘက်ကလည်း လက်နက်ကြီး ပစ်ကူတာတွေ ပြုလုပ်ခဲ့တယ်လို့ သိရပါတယ်။
ထွက်ပြေးတိမ်းရှောင်ကြတဲ့ ဒေသခံပြည်သူတွေဟာ မိုးကောင်းမြို့ဘက်အပြင် လဝါးကျေးရွာနဲ့ တောဘက်တွေမှာ နေနေကြရပြီး လူဦးရေ သုံးပုံ တစ်ပုံလောက်သာ ထွက်ပြေးသွားနိုင်တဲ့ အခြေအနေရှိတယ်လို့ အထက်ပါ ဒေသခံက ပြောပါတယ်။
ကာမိုင်းမြို့ဟာ မိုးညှင်းခရိုင်၊ ဖားကန့်မြို့နယ်အတွင်း ပါဝင်တဲ့ မြို့တစ်မြို့ဖြစ်ပြီး ၂၀၁၄ ခုနှစ် သန်းခေါင်စာရင်းအရ လူဦးရေ ၂ သောင်းနီးပါး နေထိုင်တာလည်း ဖြစ်ပါတယ်။
ပုံဟောင်းဖြစ်ပါသည်။
