မတ်၊၁၄
ဒီကနေ့ ကျရောက်တဲ့ “အပြည်ပြည်ဆိုင်ရာ မြစ်ချောင်းအင်းအိုင်များနေ့” အထိမ်းအမှတ် ဆုတောင်းအစီအစဥ်နဲ့ အသိပညာပေးတာတွေကို ဒေသခံတွေကနေ ဒီကနေ့မနက်ပိုင်း မြစ်ဆုံဒေသမှာ ပြုလုပ်ခဲ့ကြပါတယ်။
မြစ်ကြီးနားမြို့၊ မြစ်ဆုံဒေသ အနီးမှာရှိတဲ့ ကျေးရွာ ၁၅ ခုက ပြည်သူ အယောက် ၂၀၀ လောက် စုဝေးပြီး ဆုတောင်းခြင်းအပြင် မြစ်ချောင်းအင်းအိုင် ကာကွယ်ထိန်းသိမ်းဖို့နဲ့ သဘာဝပတ်ဝန်းဆိုင်ရာ အသိပညာပေးတာတွေ လုပ်ဆောင်ခဲ့တယ်လို့ အစီအစဉ်မှာ ပါဝင်ခဲ့တဲ့ ဒေသခံတစ်ဦးက မြစ်ကြီးနားသတင်းဂျာနယ်ကို အခုလို ပြောပါတယ်။
“နိုင်ငံရေးအခြေအနေ မတည်ငြိမ်တဲ့ကြားက မြစ်ချောင်း၊ အင်းအိုင်တွေ ပျက်စီးလာတယ်။ ဘေးပတ်ဝန်းကျင်တွေလည်း ပျက်စီးလာတယ်။ ရေတွေလည်း အရင်လို မကြည်လင်တော့ဘူး။ အနီရောင် ဖြစ်ကုန်တယ်။ ဆိုတော့ နိုင်ငံရေး မကောင်းရင်လည်း မြစ်ချောင်း၊ အင်းအိုင်ကို ကာကွယ်တဲ့အနေနဲ့ လုပ်တာပေါ့။ အထိမ်းအမှတ်နေ့ကို အလေးထားပြီး လုပ်ဖြစ်တာပေါ့”လို့ ဆိုပါတယ်။
နောင်လာမယ့် မျိုးဆက်သစ်တွေ လက်ထပ်မှာ အခုလို မြစ်ချောင်း၊ အင်အိုင်ပျက်စီးလာတဲ့ အဖြစ်မျိုးနဲ့ မကြုံတွေ့ရဘဲ ကြည်လင်တဲ့ရေတွေ သုံးခွင့်ရအောင် အားလုံး ကာကွယ်ရမှာ ဖြစ်တယ်လို့ အထက်ပါ ဒေသခံက ဆက်လက်ပြောပါတယ်။
“ခုက တစ်နေ့ထက်တစ်နေ့ ရေတွေ နှောက်လာတယ်။ ရွှေတူးတော့ ပဒါးတွေ ရေတွေထဲ ဝင်ကုန်တယ်။ ရေလမ်းကြောင်းလည်း ပြောင်းကုန်ပြီ။ ဆိုတော့ နောင်လာမယ့် မျိုးဆက်တွေမှာ ဒီလို မဖြစ်ပါစေနဲ့တော့။ အကုန်လုံး ကာကွယ်ဖို့ အရေးကြီးတယ်“လို့ ပြောပါတယ်။
ဒါ့အပြင် “ဧရာဝတီမြစ် ထာဝစဉ် လွတ်လပ်စွာ စီးဆင်းရေး၊ မြစ်ချောင်းများတွင် စက်ယန္တရားဖြင့် ရွှေတူးဖော်မှု ရပ်ဆိုင်းရေး၊ မြစ်ချောင်း အင်းအိုင်များ လွတ်လပ်စွာ ရှင်သန်ရေး၊ မြစ်ကြောင်း တစ်လျှောက် အကြီးစား ရေကာတာ ဆောက်လုပ်ခြင်း အလိုမရှိ၊ သန့်ရှင်းသောရေ ရရှိရေးနှင့် မြစ်ချောင်းအင်းအိုင်များ ဖျက်ဆီးသူ အလိုမရှိ”အစရှိတဲ့ ဆိုင်းဘုတ်တွေ ကိုင်ဆောင်ပြီး မှတ်တမ်းတင် ဓာတ်ပုံရိုက်ကူးခဲ့ပါတယ်။
“အပြည်ပြည်ဆိုင်ရာ မြစ်ချောင်းအင်းအိုင်များနေ့“ အထိမ်းအမှတ်ကို နှစ်စဉ်ပြုလုပ်ကြတာ ဖြစ်ပြီး ဒီနှစ်မှာ တော့ နိုင်ငံရေးအခြေအနေတွေကြောင့် နီးစပ်ရာ မြစ်ဆုံဒေသခံတွေပဲ စုဝေးပြီး ပြုလုပ်ခဲ့ကြတယ်လို့ သိရပါတယ်။
