ဇန်နဝါရီ၊၇
စစ်ကိုင်းတိုင်းဒေသသကြီး၊ တမူးခရိုင်၊ ခမ်းပတ်မြို့အနီးက ကနန်ကျေးရွာကို ဒီကနေ့ မနက်က စစ်ကောင်စီကနေ Jet Figther နဲ့ ဗုံးကြဲခဲ့တာကြောင့် အရပ်သား ၁၁ ဦး သေဆုံးသွားတယ်လို့ မြေပြင်ကာကွယ်ရေးအဖွဲ့တွေဆီက သိရပါတယ်။
ကနန်ကျေးရွာ စာသင်ကျောင်းအနီးကို စစ်ကောင်စီကနေ ပေါင် ၂၅၀ ဗုံးလေးလုံး ကြဲချတိုက်ခိုက်ခဲ့တာဖြစ်ပြီး သေဆုံးသူထဲမှာ အသက် ၃ နှစ်အရွယ်ကလေး ၃ ဦးနဲ့ အသက် ၁၆ နှစ်အရွယ် ကလေးတစ်ဦး ပါဝင်တယ်လို့ ပြည်သူ့ကာကွယ်ရေးတပ်ဖွဲ့ဝင်တစ်ဦးက မြစ်ကြီးနားသတင်းဂျာနယ်ကို အတည်ပြု ပြောပါတယ်။
“သေတဲ့အထဲမှာ ကလေးတွေရောပါတယ်။ နေအိမ် ၇ လုံးလည်း ပျက်စီးသွားတယ်။” လို့ အထက်ပါတပ်ဖွဲ့ဝင်က ဆိုပါတယ်။
ပြီးခဲ့တဲ့ ၂၀၂၃ ခုနှစ် နိုဝင်ဘာလ ၇ ရက်နေ့ နံနက်ပိုင်းက ခမ်းပတ် စစ်ကောင်စီစစ်စခန်းကို တော်လှန်ရေးပူးပေါင်းအဖွဲ့တွေက တိုက်ခိုက်သိမ်းပိုက်ထားခဲ့တာလည်း ဖြစ်ပါတယ်။
