မတ်၊၁၈
ကချင်ပြည်နယ်၊ တနိုင်းမြို့နယ်၊ နမ်ဂေါန်(Nam Gawn)ကျေးရွာဟောင်း(ရွှေမှော်)မှာ တပ်ထိုင်နေတဲ့ စစ်ကောင်စီတပ်စခန်းတစ်ခုကို ကချင်လွတ်လပ်ရေးတပ်မတော်(KIA)ကနေ ဒီကနေ့မနက် ၅ နာရီခွဲလောက်ကနေ ထိုးစစ်ဆင်တိုက်ခိုက်နေပြီး စစ်ကောင်စီဘက်က လေကြောင်းပစ်ကူတွေ ရှိနေတယ်လို့ သိရပါတယ်။
ဟူးကောင်းခရိုင်၊ ကချင်လွတ်လပ်ရေးတပ်မတော်(KIA)၊ တပ်မဟာ ၂ အောက်၊ တပ်ရင်း ၁၄ နယ်မြေအတွင်းက အထက်ပါ စစ်ကောင်စီရဲ့ ၂၃၈ တပ်စခန်းကို KIA ဘက်က စတင်ထိုးစစ်ဆင်တိုက်ခိုက်ပြီး လက်ရှိအချိန်အထိ နှစ်ဖက်တပ် တိုက်ပွဲပြင်းထန်နေတယ်လို့ အဲဒီဒေသမှာ တာဝန်ထမ်းဆောင်နေတဲ့ KIA တပ်သားတစ်ဦးက မြစ်ကြီးနားသတင်းဂျာနယ်ကို အခုလို ပြောပါတယ်။
“တိုက်ပွဲဖြစ်တာ ဟုတ်တယ်။ လေယာဉ်ရော ပျံဝဲနေသေးတယ်။ နမ်ဂေါန်က မှော်ဟုတ်တယ်။ အနီးတစ်ဝိုက် ရွှေတူးတဲ့ သူတွေတော့ ရှိတယ်”လို့ ပြောပါတယ်။
လက်ရှိအချိန်အထိ လက်နက်ကြီးပစ်ခတ်သံတွေ ကြားနေရဆဲဖြစ်ပြီး ရွှေမှော်အတွင်းက ပြည်သူတွေတော့ ထွက်ပြေးလာတာ မရှိသေးဘူးလို့ တနိုင်းဒေသခံပြည်သူတစ်ဦးကလည်း အခုလိုပြောပါတယ်။
“KIA ဘက်က သွားတိုက်တာ။ မှော်စောင့်တဲ့ စစ်ကောင်စီတပ်စခန်း ဟုတ်တယ်။ အာဏာသိမ်းပြီးနောက် ရှိလာတာ”လို့ ဆိုပါတယ်။
ဒါ့အပြင် အထက်ပါ တိုက်ခိုက်ခံရတဲ့ စစ်ကောင်စီတပ်စခန်းဟာ တပ်ခွဲတစ်ခုလို စုပေါင်းနေထိုင်တဲ့တွက် အင်အား ၁၀၀ ဝန်းကျင်လောက် ရှိနိုင်တယ်လို့လည်း ဒေသခံက ခန့်မှန်းပြောဆိုပါတယ်။
နမ်ဂေါန်(Nam Gawn)ကျေးရွာဟာ ၂၀၁၇ ခုနှစ်က နှစ်ဖက်တပ်တိုက်ပွဲကြောင့် ဒေသခံပြည်သူတွေ စွန့်ခွာခဲ့ရတဲ့ ရွာဟောင်းတစ်ခုဖြစ်ပြီး တနိုင်းမြို့ကနေ ကုန်းလမ်းနဲ့ တစ်နာရီလောက် သွားရပြီးတော့ လက်ရှိအချိန်မှာတော့ ရွှေမှော်အဖြစ်ပြောင်းလဲပြီး ရွှေတူးဖော်နေကြတဲ့ နေရာတစ်ခု ဖြစ်တယ်လို့ သိရပါတယ်။
