မတ်၊၁၅
ကချင်လွတ်လပ်ရေးအဖွဲ့အစည်း(KIO/KIA)ဌာနချုပ်ရှိရာ လိုင်ဇာမြို့အနီးက စစ်ကောင်စီအထိုင် တပ်စခန်းကြီးဖြစ်တဲ့ ဘွမ်ရေတောင်(Bumre Bum)စစ်ကောင်စီတပ်စခန်းအတွင်း ဒီကနေ့မွန်းလွဲ တစ်နာရီလောက်ကနေ KIA ဘက်က ဝင်ရောက်တိုက်ခိုက်နေပြီလို့ (KIO/KIA)ပြန်ကြားရေးတာဝန်ခံ ဗိုလ်မှူးကြီးနော်ဘူက ပြောပါတယ်။
သတင်းဌာန အချို့ကတော့ စခန်းကို သိမ်းနိုင်ပြီဖြစ်ကြောင်း ရေးသားဖော်ပြနေကြပြီး စခန်းသိမ်းနိုင်ပြီ ဟုတ်/မဟုတ်ကို မြန်မာစံတော်ချိန် ၃ နာရီခွဲအချိန်မှာ ဗိုလ်မှူးကြီးနော်ဘူကို မြစ်ကြီးနားသတင်းဂျာနယ်က မေးမြန်းတဲ့အချိန် ဝင်ရောက်နေဆဲသာဖြစ်တယ်လို့ ဖြေကြားပါတယ်။
“ဘယ်လောက်အတိုင်းအတာအထိ ရှိပြီဆိုတာ မသိသေးဘူး။ ဝင်တော့ဝင်နေပြီလို့ ပြောလို့ ရတယ်“လို့ ဗိုလ်မှူးကြီးနော်ဘူက ဆိုပါတယ်။
အထက်ပါ ဘွမ်ရေတောင် တပ်စခန်းကို မတ်လ ၇ ရက်နေ့ကနေ ဆက်တိုက်ဆိုသလို ထိုးစစ်ဆင်တိုက်ခိုက်ခဲ့တာ ဖြစ်တယ်လို့လည်း သိရပါတယ်။
ကချင်လွတ်လပ်ရေးအဖွဲ့အစည်း(KIO/KIA)ဌာနချုပ်ရှိရာ လိုင်ဇာမြို့ ပတ်လည်က စစ်ကောင်စီအထိုင်တပ်စခန်းတွေနဲ့ မြစ်ကြီးနား-ဗန်းမော်လမ်းတစ်လျှောက်က စစ်ကောင်စီတပ်စခန်း အချို့ကို မတ်လ ၇ ရက်နေ့ကနေ KIA ဘက်နေ တစ်ပြိုင်နက် ထိုးစစ်ဆင်တိုက်ခိုက်ခဲ့တာလည်း ဖြစ်ပါတယ်။
လက်ရှိ စစ်ကောင်စီရဲ့ အထိုင်တပ်စခန်းကြီးတွေ ဖြစ်တဲ့ အင်တပ်(စ်)တောင်(N tap Bum dap)တပ်စခန်း၊ ဖွန်းပျန်တောင် (Hpun pyen bum)၊ နမ်ဖတ်ချောင်းတံတားဂိတ်စခန်း(Nam Hpak Hka Mahkrai post)၊ မလိတပ်စခန်းကြီးအပြင် ခယာတောင်(Hkaya Bum)တပ်စခန်းကြီး အနီးအနားက ရှေ့တန်းကာကင်းစခန်းငယ်တွေ စုစုပေါင်း စခန်းကြီး/ငယ် ၂၀ ထက်မနည်းကို သိမ်းပိုက်ထားနိုင်ပြီလို့ ဗိုလ်မှူးကြီးနော်ဘူရဲ့ ပြောပြချက်အရ သိရတာပါ။
စစ်ကောင်စီဘက်ကလည်း တိုက်ပွဲဖြစ်ပွားနေတဲ့ နေရာအနီးတစ်ဝိုက် နေ့စဉ်နဲ့အမျှ လေကြောင်းတိုက်ခိုက်မှုတွေ ပြုလုပ်နေဆဲလည်း ဖြစ်ပါတယ်။
