ဧပြီ၊၁၈
ကချင်ပြည်၊ မြစ်ကြီးနားမြို့ အထွက်(၂၁)မိုင် စုပေါင်းစစ်ဆေးရေးဂိတ် တိုက်ခိုက်ခံရပြီးနောက် နှစ်ပတ်အကြာတွင် စစ်ကောင်စီတပ်သားများနှင့် ရဲများမှ ယခင်အတိုင်း လမ်းသွား၊ လမ်းလာ ပြည်သူများကို စစ်ဆေးမှုများ ပြုလုပ်လျက် ရှိနေကြောင်း သိရသည်။
ကချင်လွတ်လပ်ရေးတပ်မတော်(KIA)မှ သွားရောက်တိုက်ခိုက်ခဲ့ပြီးနောက် အဆိုပါဂိတ်တွင် ယခင်ကထက် လုံခြုံရေး ပိုတိုးထားသည်သာမက စစ်ဆေးမှုများ တင်းကြပ်လာကြောင်း ဒေသခံတစ်ဦးက မြစ်ကြီးနားသတင်းဂျာနယ်သို့ ပြောသည်။
“အခုက ပြန်ဆောက်နေပြီ။ အရင်ကထက် လူဦးရေ ပိုတိုးထားတာတွေ့ရတယ်။ လူ (၆၀)ဝန်းကျင်လောက်တော့ ရှိမယ်။ အခုက အရင်ကထက် ပိုစစ်လာတာ။ သင်္ကြန်ကာလတော့ မဟုတ်ဘူး အဲဒီမတိုင်ခင်တွေက အရမ်းစစ်တာ။ ပစ်ခတ်မှု ဖြစ်ပြီး နှစ်ပတ်လောက်ကနေ ပြန်စနေပြီ။ ရဲနဲ့ စစ်သားတွေရှိတယ်။ အရင်ကထက် ပိုတင်းကြပ်လာတယ် ပြောရမယ်”ဟု ၎င်းကဆိုသည်။
အဆိုပါဂိတ်ကို ကချင်လွတ်လပ်ရေးတပ်မတော်(KIA)မှ မတ်လ(၁၉)ရက်နေ့က သွားရောက်တိုက်ခိုက်ခဲ့ပြီး ဂိတ်စခန်းတွင်ရှိသည့် ရဲနှစ် စစ်သားများ ထိခိုက် သေဆုံးမှုခဲ့သည်။
