ဇူလိုင်(၄)
ရွှေကူမြို့နယ်အတွင်းရှိ စစ်ကောင်စီတပ်ဖွဲ့ဝင်တွေအနေနဲ့ ပြည်သူ့ကာကွယ်ရေးတပ်ဖွဲ့ (PDF) ထဲကို အလင်းဝင်လာသူတွေ ရှိနေတယ်လို့ နီးစပ်သူတစ်ဦးဆီကနေ သိရပါတယ်။
ပြီးခဲ့တဲ့ ဇွန်လ လဝက်လောက်ကနေ ဒီကနေ့ထိ PDF ထဲကို အလင်းဝင်လာသူ (၅) ဦးခန့်ရှိပြီဖြစ်ပြီး တစ်ချို့မှာလက်နက်အပြည့်အစုံနဲ့ ဝင်ရောက်လာကြတယ်လို့ နီးစပ်သူတစ်ဦးက မြစ်ကြီးနားသတင်းဂျာနယ်ကို ပြောပါတယ်။
“ စစ်သားတွေက PDF တွေဘက်ကို ပြောင်းလာတာပါ့အေ။ စစ်သားတွေက ဘက်ပြောင်းတာတွေများလာတယ်။တစ်ခါတစ်လေတော့ ဒီတိုင်း ဘာမှ မပါပဲနဲ့ တစ်ခါတစ်လေတော့ လက်နက်တွေပါတယ်လို့ သတင်းကြားရတယ်” လို့ နီးစပ်သူက ဆိုပါတယ်။
ရွှေကူမြို့နယ်အတွင်းက ကျေးရွာတွေ ထဲကို စစ်ကောင်စီဘက်ကနေ မကြာခဏစစ်ကြောင်းထိုး ဝင်ရောက်တာစားနပ်ရိက္ခာသယ်ဆောင်တာမျိုးတွေ ရှိနေပြီး ရွှေကူမြို့နယ်အတွင်းက PDF တွေအနေနဲ့လည်း စောင့်ကြိုပစ်ခတ်တာမျိုးတွေ ရှိပါတယ်။
ဒါ့အပြင် ရွှေကူမြို့နယ် သင်္ဘောအင်းကျေးရွာကို ဇွန်လ (၃၀) ရက်နေ့က စစ်ကြောင်းထိုးရောက်ရှိခဲ့တဲ့ စစ်ကောင်စီတပ်တွေအနေနဲ့ ရွှေကူမြို့နယ်အတွင်းသို့ ပြန်လည်ရောက်ရှိသွားပြီ ဖြစ်တယ်လို့လည်း သိရပါတယ်။
