မတ်၊ ၁၃
ရခိုင်ပြည်နယ်၊ မောင်တောမြို့နယ်က စခန်းစွန့်ပြီးထွက်ပြေးသွားတဲ့ စစ်ကောင်စီတပ်ဖွဲ့ဝင်တွေဟာ စခန်းထဲက ပစ္စည်းတွေနဲ့ အစားအသောက်တွေထဲမှာ လူကိုသေစေနိုင်တဲ့အဆိပ်တွေထည့်ထားခဲ့တယ်လို့ ရက္ခိုင့်တပ်တော် (AA) က ဒီနေ့မနက်အစောပိုင်းမှာ ထုတ်ပြန်လိုက်ပါတယ်။
အခုအချိန်မှာတော့ AA ဟာ မောင်တောမြို့နယ်ထဲက လက်နက်မချသေးတဲ့ စစ်ကောင်စီစခန်းတွေကို တိုက်ခိုက်သိမ်းပိုက်နေတာဖြစ်ပြီး အဲဒီထဲက စခန်းတစ်ခုဖြစ်တဲ့ အောင်သပြေနယ်ခြားစောင့်စခန်းကို မတ်လ ၁၁ ရက်နေ့က သိမ်းယူနိုင်ခဲ့တာ ဖြစ်ပါတယ်။
စခန်းသိမ်းပိုက်ပြီး ဝင်ရောက်ရှင်းလင်းတဲ့အချိန် စစ်ကောင်စီတပ်ဖွဲ့ဝင်တွေဟာ ကျန်ခဲ့တဲ့ အစားအသောက်တွေနဲ့ ရေဗူးတွေမှာ လူသေစေနိုင်တာတွေထည့်ထားတာ၊ စခန်းထဲမှာ အဆိပ်တွေ ဖြန်းထားတာ စတာတွေကိုပြုလုပ်သွားခဲ့တယ်လို့ AA က ဆိုပါတယ်။
“အခြားသော တော်လှန်ရေးလက်နက်ကိုင်အဖွဲ့အစည်းများအနေဖြင့် စခန်းသိမ်းတိုက်ပွဲများတွင် သိမ်းဆည်းရမိသော စားနပ်ရိက္ခာများကို သတိထားကြရန် စေတနာဖြင့် အထူးသတိပေးလိုက်ပါသည်။“ ဟုလည်း AA က ထုတ်ပြန်ချက်တွင် ဖော်ပြထားသည်။
၂၀၂၃ ခုနှစ် အောက်တိုဘာ ၂၇ ရက်နေ့ကစခဲ့တဲ့ ရှမ်းမြောက်တိုက်ပွဲတွေအပါအဝင် ရခိုင်ပြည်နယ်က စခန်းသိမ်းတိုက်ပွဲတွေမှာ စစ်ကောင်စီဘက်က အခုလိုအဆိပ်တွေနဲ့ လုပ်ကြံတဲ့အကြောင်းကို ညီနောင်မဟာမိတ် ၃ ဖွဲ့က အခုလို ထုတ်ပြန်ဖူးတာ မရှိခဲ့ပါဘူး။
စစ်တပ်က အာဏာသိမ်းပြီးတဲ့နောက် တော်လှန်ရေးတပ်ဖွဲ့ဝင်တွေက စခန်းသိမ်းတဲ့အချိန် စစ်ကောင်စီဘက်က မြေမြုပ်မိုင်းတွေထောင်ခဲ့ဖူးတဲ့ ဖြစ်စဉ်တွေ ရှိခဲ့ဖူးပေမဲ့ အခုလို အဆိပ်နဲ့လုပ်ကြံတဲ့ အကြောင်းကတော့ ပထမဆုံးအကြိမ် ထုတ်ပြန်မှုလည်း ဖြစ်ပါတယ်။
အဲဒီ မတ်လ ၁၁ ရက်နေ့က အောင်သပြေစခန်းသိမ်းတိုက်ပွဲမှာတော့ စစ်ကောင်စီတပ်ဖွဲ့ဝင်တွေရဲ့ အလောင်းတချို့နဲ့ လက်နက်ခဲယမ်းတွေကို သိမ်းဆည်းနိုင်ခဲ့တယ်လို့ သိရပါတယ်။
ဒါ့အပြင် အဲဒီစခန်းက စစ်ကောင်စီတပ်သား ၁၇၉ ယောက်ဟာလည်း တစ်ဖက် ဘင်္ဂလားဒေ့ရှ်နိုင်ငံဘက်ကို ထွက်ပြေးသွားတယ်လို့ AA က ထုတ်ပြန်ထားပါတယ်။
၂၀၂၃ ခုနှစ် နိုဝင်ဘာ ၁၃ ရက်နေ့က ရခိုင်ပြည်နယ်မှာ တကျော့ပြန်ဖြစ်ပွားခဲ့တဲ့တိုက်ပွဲတွေထဲ ဘင်္ဂလားဒေ့ရှ်နိုင်ငံထဲကို ထွက်ပြေးခဲ့တဲ့စစ်ကောင်စီတပ်သားစုစုပေါင်းဟာ အခုထွက်ပြေးတဲ့သူတွေအပါအဝင် အယောက် ၆၀၀ လောက်ရှိနေပါပြီ။
