ဖေဖော်ဝါရီ၊၂၂
ကချင်ပြည်နယ်၊ ဖားကန့်မြို့၊ မရှီကထောင်ရပ်ကွက်နဲ့ မော်ဝမ်းရပ်ကွက်မှာ စစ်ကောင်စီက လမ်းသွားလမ်းလာပြည်သူတွေကို စစ်ဆေးရေးတွေ ပြုလုပ်ခဲ့တယ်လို့ သိရပါတယ်
မရှီကထောင် ရပ်ကွက်က ရွှေမြန်မာဆီဆိုင်အရှေ့လမ်းမပေါ်နဲ့ မှော်ဝမ်းရပ်ကွက်က ပန်းတင်တံတားမှာ ဒီကနေ့ မနက် ၁၁ နာရီခန့်ကစပြီး စစ်ကောင်စီကနေ လမ်းသွားလမ်းလာပြည်သူတွေကို မှတ်ပုံတင်ကအစ စစ်ဆေးရေးတွေ ပြုလုပ်ခဲ့တာဖြစ်တယ်လို့ ဖားကန့်ဒေသခံ အမျိုးသားတစ်ဦးက ပြောပါတယ်။
“ဒီနေ့မှ ပြန်စစ်နေကြတာ မစစ်တာကြာပြီ။ အကုန်စစ်တယ် ပန်းတင်တံတားမှာ စစ်တဲ့အချိန် လူလေးယောက် ဖမ်းခံရတယ်လို့ကြားတယ်။ အတိအကျတော့ မသိရသေးဘူး”လို့ အထက်ပါ အမျိုးသားက ပြောပါတယ်
စစ်ကောင်စီတပ်က လမ်းသွားလမ်းလာပြည်သူတွေကို နေ့လယ် ၁၂ နာရီခန့်အထိ စစ်ဆေးရေးတွေ ပြုလုပ်ခဲ့တာ ဖြစ်တယ်လို့ သိရပါတယ်။
ဖားကန့်မြို့ ဥရုကျောက်စိမ်းတောင်တံတားထိပ်မှာလည်း ဒီကနေ့ မနက် ၁၀ နာရီခွဲခန့်က စစ်ကောင်စီအင်အား ၂၅ ဦးခန့်နဲ့ စစ်ဆေးရေးဆောင်ရွက်ခဲ့တယ်လို့ နောက်ထပ် ဖားကန့်ဒေသခံတစ်ဦးရဲ့ ပြောချက်အရသိရပါတယ်။
ပြီးခဲ့တဲ့ ဖေဖော်ဝါရီလ ၂၀ ရက်နေ့ကလည်း လုံးခင်းကျေးရွာက အမျိုးသား ၄ ဦးကို အမည်မသိအဖွဲ့တစ်ဖွဲ့က ဖမ်းဆီးသွားတဲ့ ဖြစ်စဉ်လည်း ရှိခဲ့ပါတယ်။
တိုက်ပွဲတွေ မကြာခဏ ဖြစ်ပွားနေတဲ့ ဖားကန့်မြို့နယ်မှာ စစ်ကောင်စီက စုံစမ်းစစ်ဆေးရေးတွေ ပြုလုပ်နေရုံမက ဖမ်းဆီးမှုတွေလည်း ပြုလုပ်နေတာဖြစ်ပါတယ်။
စစ်ကောင်စီကနေ အသက်ပြည့်ပြီး နိုင်ငံသားတိုင်း စစ်မှုမထမ်းမနေရဥပဒေကို အသက်သွင်းပြီးတဲ့နောက် နေရာအနှံ့မှာ စစ်ဆေးဖမ်းဆီးမှုတွေ ပြုလုပ်နေတာကိုလည်း တွေ့ရပါတယ်။
ဓါတ်ပုံ- ပုံဟောင်းဖြစ်ပါသည်။
