မေ၊၄
ကချင်ပြည်နယ်၊ ပူတာအိုမြို့ အထက်ဘက်ရှိ မဂွေဇ-ခေါင်လန်ဖူးနှင့် ပန်နန်းဒင် သွားလမ်းတစ်လျှောက် နေရာ အများအပြားတွင် မြေပြိုမှုများ ရှိနေသောကြောင့် ပြည်သူများ သွားလာရေးအတွက် အခက်အခဲ ကြုံတွေ့နေရကြောင်း သိရသည်။
ရေခဲတောင်ရှိရာ အရပ်များတွင် မိုးများနေ သောကြောင့် ရေတက်မှု ဖြစ်လာပြီး တစ်ဆက်တည်းမှာပင် ဧပြီလ ဒုတိယအပတ်မှ စပြီး မြေပြိုမှုများ ဖြစ်လာ၍ ပြည်သူများ အခက်အခဲကြုံတွေ့နေရကြောင်း ပူတာအို ဒေသခံတစ်ဦးက မြစ်ကြီးနားသတင်းဂျာနယ်သို့ ပြောပါသည်။
“ဟုတ်တယ်။ မြေပြိုတာ ကြားတယ်။ ကားလမ်း သွားလို့ရတဲ့ နေရာကနေတော့ သွားနေကြပါတယ်။ မိုးများလို့ရေ၊ ရေခဲတောင်ဘက်မှာလည်း မိုးများတော့ ရေတွေတက်လာတယ်။ ပန်နန်းဒင် အထက်ဘက်မှာရော တော်တော်များများ မြေပြိုတယ်။ပစ္စည်း ပို့ဆောင်တာတွေ အခက်အခဲ ရှိတာပေါ့”လို့ သူက ဆိုပါတယ်။
လက်ရှိ ပူတာအိုမှ ခေါင်လန်ဖူး သွားလမ်းတစ်နေရာတွင် ကမ်းပါးပြိုကျထားခြင်းကြောင့် ခရီးသွားလာရေး နှောင့်နှေးနေရကြောင်း အခြား ဒေသခံတစ်ဦးက ပြောသည်။
” (၁၀)ရက်ကျော်လောက်တော့ ရှိပြီ။ လမ်းက ကျောက်ချောလမ်းပဲ ရှိသေးတယ်။ ကမ်းပါးပြိုတော့ အဲဒီလို ဖြစ်သွားတာ။ ဆိုင်ကယ်တွေလည်း ထမ်း၊ တွန်းပြီး ဖြတ်ရတယ်။ အခုက တော်တော် ခက်သွားတာပေါ့။ ခေါင်လန်ဖူးသွားလမ်းမှာ ဟုတ်တယ်”ဟု ၎င်းက ဆိုသည်။
ပန်နန်းဒင်၊ ခေါင်လန်ဖူး အစရှိသည့် နေရာများသည် ဝေးလံ ခေါင်ပါးသောနေရာဒေသများ ဖြစ်၍ ယခုကဲ့သို့ သွားလမ်း ပျက်စီးနေပါက ကုန်ဈေးနှုန်းမြင့်တက်မှုများ ကြုံတွေ့ လာနိုင်သည်ကို စိုးရိမ်နေကြသည်။
လက်ရှိမြေပြိုထားသော နေရာများကို အမြန်ဆုံး ဖြေရှင်းပေးရန်လည်း ဒေသခံပြည်သူများ လိုလား နေကြသည်။
