ဧပြီ၊၄
ကချင်ပြည်နယ်၊ ဖားကန့်မြို့နယ်၊ ဒွမ်ဘန်(၂၉၈)တပ်စခန်းမှ ခြေလျင်တက်လာသော စစ်ကောင်စီစစ်ကြောင်းသည် ယနေ့ မွန်းလွဲ(၁)နာရီခန့်က လဝါးကျေးရွာအုပ်စု၊ မဂေါင်းတောင်ကျေးရွာတွင် ကချင်လွတ်လပ်ရေးတပ်မတော် KIAက မိုင်းဆွဲတိုက်ခိုက်ခဲ့ကြောင်း သိရသည်။
မဂေါင်းတောင်ကျေးရွာထိပ်တွင် မိုင်းဆွဲခံရပြီးနောက် စစ်ကောင်စီတပ်ဖွဲ့မှ လက်နက်ကြီး /ငယ်များ ရမ်းသန်းပစ်ခတ်နေခြင်းကြောင့် လဝါးကျေးရွာ နှစ်ခြင်းဘုရားကျောင်းဝင်းရှိ ကလေးငယ်များနှင့် ဒေသခံများ စိုးရိမ်ထိတ်လန့်နေကြကြောင်း မြစ်ကြီးနားသတင်းဂျာနယ်သို့ပြောသည်။
“ဒွမ်ဘန်၊ မန်ပန်တပ်ရင်းဘက်က စစ်ကြောင်းတွေ မဂေါင်းတောင်မှာ မိုင်းဆွဲခံရတာ။ တစ်နာရီလောက်က မိုင်းသံအရင်မြည်ပြီးမှ လက်နက်သေး လက်နက်ကြီးသံတွေ မြည်တာ။ မိနစ်နှစ်ဆယ်လောက် ပစ်နေတာ။ခုလောလောဆယ်တော့ ငြိမ်နေတယ်။ အခြေအနေမသိသေးရသေးတော့ အရမ်းစိုးရိမ်နေကြတယ်။ အခုဘုရားကျောင်းမှာက နွေရာသီကျောင်းဖွင့်ထားတော့ ကလေးတွေလည်းကြောက်လို့ ဝပ်နေကြတယ်။ “
လက်ရှိအချိန် ထိခိုက်ပျက်စီးမှု အခြေအနေများ မသိရှိရသေးကြောင်းနှင့် ၎င်းစစ်ကောင်စီတပ်ဖွဲ့ဝင်များသည် တနိုင်းမြို့မှ လိုင်ဇာမြို့သို့ တပ်ချိန်းရန်ထွက်ခွာသည့် တပ်ဖွဲ့များဖြစ်ကြောင်း သိရသည်။
