ဗန်းမော်-မိုးမောက်လမ်း စီအင်ကျေးရွာ ငါးမိုင်ဂိတ်တွင် စစ်ဆေးမှုတင်းကြပ်ခြင်းကြောင့် ပြည်သူများ အခက်ကြုံ

ကချင်ပြည်နယ်၊ ဗန်းမော် – မိုးမောက်ကားလမ်းမကြီးရှိ စီအင်ကျေးရွာ၊ ငါးမိုင်ဂိတ်တွင် စစ်ဆေးမှုများ ပိုမိုများပြားလာသည့်အတွက် ပြည်သူများ ဖြတ်သန်းသွားလာရာတွင် အခက်အခဲကြုံတွေ့နေရသည်ဟု သိရသည်။

အဆိုပါ စီအင်၊ငါးမိုင်ဂိတ်တွင် ( ၂၀၂၁) ခုနှစ်ကတည်းက စစ်ဆေးမှုများရှိခဲ့သော်လည်း လွန်ခဲ့သည့် အပတ်မှစတင်ကာ ပိုမိုစစ်ဆေးလာကြောင်းနှင့် စစ်ဆေးရေးဂိတ်များ တိုးလာကြောင်း မိုးမောက်ဒေသခံ တစ်ဦးက မြစ်ကြီးနားသတင်းဂျာနယ်သို့ ပြောသည်။

“ဒီနှစ်ပါတ်ကြားမှာ စစ်ဆေးမှုပိုထူလာတာ။ အရင်ကတော့ ရဲတွေပဲစစ်တယ်။ ခုက ရဲတွေတစ်ဖက် ၊ စစ်သား​တွေတစ်ဖက် ဝတ်စုံပြည့်နဲ့ စစ်နေကြတာ။ အင်အားတွေ များလာတယ်။ စစ်သားတွေက မြင်နေကျတွေမဟုတ်ဘူး။ တွေ့ခဲ့တာတော့ တပ်မ(၈၈)လို့ရေးထားတယ်။ ဘယ်တပ်ရင်းကလဲတော့ မသိဘူး။ပိုဆိုးတာက ညနေပိုင်း သူတို့သတ်မှတ်ထားတဲ့ ချိန်မပြည့်ခင်မှာ တံခါးပိတ်တာတွေရှိတယ်။” ဟု ဆိုသည်။

လက်ရှိတွင် စစ်ကောင်စီတပ်သားများနှင့် ရဲတပ်သားများအပါအဝင် နေ့၊ ည အင်အား(၃၀)ခန့်ချထားပြီး ဖြတ်သွား/လာ ပြည်သူများ၏ ဆိုင်ကယ်၊ ကားများနှင့် နိုင်ငံရေးစိစစ်ရေးကဒ်ပြား(မှတ်ပုံတင်)များကို စစ်ဆေးနေသည်ဟုဆိုသည်။

ယင်းဂိတ်တွင် မနက်(၆)နာရီမှ ည(၇)နာရီထိသာ ဖြတ်သန်းသွားလာခွင့် ပြုထားသည့်အပြင် ကွင်းလမ်း အခြေအနေဆိုးသည့်အတွက် အရေးပေါ်လူနာများပို့ဆောင်ရာတွင်လည်း အခက်အခဲများစွာ ကြုံတွေ့နေရသည်ဟု ဒေသခံက ဆိုသည်။

” (၂၀၂၁)တုန်းကလည်း တော်တော်စစ်တယ်။ လူနာတင်ယာဉ်နဲ့ ကိုဗစ်လူနာတွေတင်လာခဲ့ရင်တောင်မှ ပြည်သူတွေကို သေနတ်နဲ့ချိန်တာမျိုးထိဖြစ်တယ်။ ဂိတ်ကို ကွင်းတဲ့ လမ်းတော့ရှိတယ်။ ကားတွေဖြတ်တာများပြီး မိုးရွာတော့ လမ်းတွေ ဆိုးသွားတယ်။ကားသေးတွေဆို သွားလို့မရဘူး။ လူနာတင်ယာဉ်နဲ့ မဟုတ်ဘဲ ကိုယ်ပိုင်ကားနဲ့ဖြတ်လာရင် ဖြတ်ကျော်ခွင့်မပေးဘူး။ဖြတ်သွားဖြတ်လာ တော်တော်လေးအခက်ကြုံရတယ်။ “ဟု ပြောသည်။

ထို့အပြင် ယင်းဂိတ်တွင် ကုန်တင်ကားများနှင့် ညရေးညတာ ဖြတ်သန်းသွားလာသူများထံမှ ငွေကြေးတောင်းခံမှုများရှိပြီး ဆဲဆိုကြိမ်းမောင်းမှုများ ရှိကြောင်းလည်း သိရသည်။