မိုးညှင်း၊မတ်(၁၁)
ယနေ့ မတ်(၁၁)ရက်မနက်ပိုင်းက မိုးညှင်းမြို့အတွင်း
စစ်ကားနှင့် ရဲကားယာဥ်တန်းများနှင့် မြို့အနှံ့
လှည့်လည်တင်းကြပ်နေသော်လည်း စစ်အာဏာရှင်ကိုဆန့်ကျင်ကြောင်း မိုးညှင်းလူငယ်အချို့ကဆိုင်ကယ်သပိတ်ဖြင့်လှည့်လည်ဆန္ဒထုတ်ဖော်ခဲ့ကြသည်။
အဆိုပါ ဆိုင်ကယ်သပိတ်စစ်ကြောင်းနောက်သို့ ရဲနှင့်စစ်တပ်အဖွဲ့က လိုက်လံဖမ်းဆီးခဲ့ရာ သိမ်အင်းရပ်ကွက်အရောက်တွင် အရှေ့စုရပ်ကွက်မှ မခိုင်ဇာဝင်းဆိုသူ အမျိုးသမီးတစ်ဦး ဖမ်းဆီးခံခဲ့ရသည်။
အာဏာသိမ်းစစ်ကောင်စီအား ဆန့်ကျင်သည့် သပိတ်စစ်ကြောင်းကို မိုးညှင်းမြို့တွင် တစ်လကျော်ဆန္ဒထုတ်ဖော်လျှက်ရှိပြီး ပြီးခဲ့သည့် မတ်လ(၈)ရက်နေ့ကလည်း ငြိမ်းချမ်းစွာဆန္ဒထုတ်ဖော်နေသည့် ပြည်သူများအား အကြမ်းဖက်ဖြိုခွင်းချိန် အမျိုးသားတစ်ဦး လက်မောင်းတွင်ပြင်းထန်ဒဏ်ရာရရှိခဲ့ပြီး၊အမျိုးသမီးတစ်ဦး၏ ခါးတွင် ရာဘာကျည် ထိမှန်ခဲ့သည်။
လက်ရှိမိုးညှင်းမြို့တွင် စစ်အာဏာသိမ်းကောင်စီအားဆန့်ကျင်ဆန္ဒပြရာတွင်ပါဝင်မှုကြောင့် ဖမ်းဆီးခံရသူ ဖေဖော်ဝါရီ (၂၁)ရက်ညတွင် ကိုဝင်းညီညီထွန်း(ခ)နတ်ဆရာနှင့် ကိုကျော်ကောင်းတို့ ၂ယောက်အား သဘာဝဘေးစီမံဆိုင်ရာဥပဒေပုဒ်မ (၂၅)ဖြင့် ဖမ်းဆီးခဲ့ပြီးနောက် အကြမ်းဖက်ဖြိုခွင်းဖမ်းဆီးသည့်မတ်လ (၈)ရက်နေ့က လည်း စီတန်းလှည့်လည်ရာတွင်ပါဝင်သူ (၂)ဦးအနက် တစ်ဦးပြန်လွှတ်ပေးခဲ့ပြီး ရေလယ်ကျွန်းရပ်ကွက်နေထိုင်သူ မမေသဲကို ပုဒ်မ ၅၀၅ (က)ဖြင့်ဖမ်းဆီးခဲ့သည်။
ယနေ့မတ်လ(၁၁)ရက်နေ့တွင်လည်း ဆိုင်ကယ်သပိတ်လှည့်လည်ရာတွင်ပါဝင်သူ အရှေ့စုရပ်ကွက်(၃)တွင်နေထိုင်သူ မခိုင်ဇာဝင်းအား မိုးညှင်းမြို့နယ်ရဲတပ်ဖွဲ့မှူးက တရားလိုပြုလုပ်ပြီး ပုဒ်မ ၅၀၅(က)ဖြင့် တရားစွဲဆိုချုပ်နှောင်ထားသည်။
