ဇွန်၊၁၆
စက်သုံးဆီစျေးနှုန်း မြင့်တက်နေမှုတွေကြောင့် မြစ်ကြီးနား-ပူတာအို ပြေးဆွဲနေတဲ့ ခရီးသည်တင်ယာဉ်အချို့ ရပ်နားနေကြရပြီလို့ သိရပါတယ်။
လက်ရှိ ဓာတ်ဆီဈေးတွေ တက်နေပေမယ့် ခရီးသွားပြည်သူတွေကို ပုံမှန် ဈေးနှုန်းနဲ့ပဲ ပြေးဆွဲနေရတဲ့ အနေအထားတွေကြောင့် အချို့ ကားသမားတွေဟာ ရပ်နားကုန်ပြီဖြစ်တယ်လို့ ယာဉ်မောင်းတစ်ဦးက မြစ်ကြီးနားသတင်းဂျာနယ်ကို အခုလို ပြောပါတယ်။
“ဓာတ်ဆီက ဒီက (၂)သိန်းလောက်ထည့်သွားမှ မြစ်ကြီးနားရောက်တယ်။ ဘယ်လိုမှ မကိုက်ဘူး။ (၇)ယောက် တင်ရင်တောင် ဆီဈေးလောက်ပဲ ဆိုတော့ မကိုက်ဘူးပေါ့။ အချို့ကတာ့ ရပ်နားလိုက်ကြပြီ။ ကျွန်တော်တို့က ပရဟိတ သွားသလို ဖြစ်နေတယ်”လို့ သူက ပြောပါတယ်။
ယာဉ်ပြေးဆွဲတဲ့ ကားသမားတွေ ရပ်နားလာတဲ့သူ များလာနေတာကြောင့် ပူတာအို ဘက်က ဈေးရောင်း၊ ဈေးဝယ်တွေ ခက်လာမယ့် အခြေအနေရှိပြီး ကုန်ဈေးနှုန်းတွေပါ ပိုမို မြင့်တက်လာနိုင်တယ်လို့ အထက်ပါ ကားသမားက ဆိုပါတယ်။
ပူတာအိုမြို့မှာ ကား ဂိတ်(၈)ခုလောက်ပြီးတော့ ပုံမှန် မြစ်ကြီးနား-ပူတာအိုဘက် အတက် အဆင်းလုပ်နေတဲ့ ကားဟာ အစီး(၅၀) လောက် ရှိတယ်လို့လည်း သိရပါတယ်။
ကားသမားတွေအနေနဲ့ ခရီးသည် တစ်ယောက်ကို ပုံမှန် ကားခ(၄)သောင်းဝန်းကျင် ကောက်ခံပြီး ပြေးဆွဲနေရတာကြောင့် ပူတာအိုအတက် လမ်းတစ်လျှောက်က စစ်ကောင်စီ ဂိတ်တွေမှာ ဂိတ်ကြေးပေးဆောင်ရတာတွေ၊ ဓာတ်ဆီဈေးနှုန်းတွေကြောင့် အဆင်မပြေမှုတွေ ရှိနေတာပါ။
ဒါ့အပြင် ပုံမှန် တစ်ရက်တည်းနဲ့ရောက်တဲ့ ခရီးကို လက်ရှိမှာတော့ လမ်းမှာတင် အခြေအနေအမျိုးမျိုးကြောင့်စောင့်ဆိုင်းနေရတာမျိုးတွေရှိတာကြောင့် ခရီးသွားနှောင့်နှေးရတယ်လို့လည်း ပြောဆိုနေကြပါတယ်။
