ဖေဖော်ဝါရီ၊ ၂၉
တိုက်ပွဲတွေဖြစ်ပွားပြီး ထွက်တိမ်းရှောင်နေရတာကြောင် အတန်းတင်စာမေးပွဲ ဖြေဆိုခွင့်မရလိုက်တဲ့ ဖြကြီးနားမြို့နယ်၊ ဆင်ဘိုမြို့က ကျောင်းသူကျောင်းသားတွေကို နစ်နာမှုမရှိအောင် ဆောင်ရွက်ပေးဖို့ ကျောင်းသားမိဘတွေက သက်ဆိုင်ရာပညာရေးဌာနကို တောင်းဆိုနေကြပါတယ်။
အဲဒီကလေးတွေကတော့ Grade 5(ပဉ္စမတန်း)နဲ့ Grade 9 (နဝမတန်း) ကျောင်းသူကျောင်းသားတွေ ဖြစ်ပြီး ကလေးတွေရဲ့ စာသင်နှစ်မဆုံးရှုံးစေရေးဟာ ပညာရေးဌာနရဲ့ လုပ်ဆောင်မှုပေါ် မူတည်နေတယ်လို့ ဒေသခံကျောင်းသားမိဘတစ်ဦးက မြစ်ကြီးနားသတင်းဂျာနယ်ကို ပြောပါတယ်။
“အစိုးရကိုတင်ပြလည်း သူတို့ကလည်း ဘာမှတတ်နိုင်မှာ မဟုတ်ဘူး။ လက်ရှိဖြေထားတဲ့ နောက်ဆုံးစာမေးပွဲနဲ့ပဲ၊ ရလဒ်နဲ့ပဲ အအောင်၊ အရှုံးကို စဉ်းစားပေးမလား၊ ဒါမှမဟုတ်ရင် အားလုံးအအောင်မရှိတင်ပေးမလား၊ ဒါမှမဟုတ်ရင်လည်း စာမေးပွဲမဖြေရတဲ့အတွက် နဂိုအတိုင်းပဲပြန်တက်ခိုင်းမလား။ ကျွန်တော်တို့လည်း ဘာမှကို အကူအညီတောင်းလို့မရဘူး။“လို့ ဆိုပါတယ်။
လက်ရှိအချိန်မှာ ဆင်ဘိုမြို့ကို KIA နဲ့ ပူးပေါင်းတပ်တွေ ထိန်းချုပ်ထားပြီး မြို့တွင်း မတည်ငြိမ်မှုတွေ ရှိနေတဲ့အတွက်ကြောင့် ပြည်သူတွေဟာ ထွက်ပြေးတိမ်းရှောင်နေကြရပြီးတော့ ဒီနှစ်ရဲ့ အတန်းတင်စာမေးပွဲကို ဖြေဆိုခွင့် မရလိုက်ကြတာဖြစ်တယ်လို့ သိရပါတယ်။
ခရိုင်စစ်ဖြစ်တဲ့ အထက်ပါအတန်းတွေရဲ့ အတန်းတင်စာမေးပွဲကို
လွန်ခဲ့တဲ့ဖေဖော်ဝါရီလ ၂၂ ရက်နေ့မှာ စတင်ဖြေဆိုခဲ့တာဖြစ်ပါတယ်။
ဒီနှစ်ရဲ့ အတန်းတင်စာမေးပွဲကို မဖြေလိုက်ရတဲ့ ဆင်ဘိုမြို့အတွင်းက Grade 5(ပဉ္စမတန်း)နဲ့ Grade 9 (နဝမတန်း) ကျောင်းသူကျောင်းသားတွေအနေနဲ့ လာမယ့်ဇွန်လစာသင်နှစ်မစခင်မှာ ပြန်လည်ဖြေဆိုနိုင်အောင် ဆောင်ရွက်ပေးသွားမှာ ဖြစ်ကြောင်း ဆင်ဘိုမြို့ ကျောင်းသားမိဘဆရာအသင်းမှာရှိတဲ့ တာဝန်ရှိသူတစ်ဦးက ပြောပါတယ်။
“ကျွန်တော်ကျောင်းအုပ်ဆရာကြီးနဲ့ ဆက်သွယ် မေးမြန်တဲ့အခါမှာတော့ သူတို့ကတော့ မဖြေရတဲ့ ကလေးတွေအတွက်ကိုက ကျောင်းဖွင့်ရာသီရောက်လို့ ကျောင်းစဖွင့်တဲ့လမှာပဲ အဲမေးခွန်းနဲ့ ပြန်ပြီးတော့ ဖြေခိုင်းမယ်ပေါ့။ အဲဒါတော့ပြောတယ်ဗျ။”လို့ ဆိုပါတယ်။
အခုချိန်မှာ ကလေးတွေက အဝတ်အထည်အနည်းငယ်နဲ့ ကြုံရာနေရာကို ထွက်ပြေးတိမ်းရှောင် နေကြချိန်ဖြစ်တဲ့အတွက် အားလုံးပြန်လာပြီး မဖြေဆိုနိုင်ကြမှာကို စိုးရိမ်မိကြောင်းလည်း ကျောင်းသားမိဘက ဆက်လက်ပြောပါတယ်။
တက္ကသိုလ်ဝင်တန်း စာမေးပွဲဖြေဆိုမယ့် Grade 12 ကျောင်းသူကျောင်းသားတွေကိုတော့ ဖေဖော်ဝါရီလ ၁၉ ရက်နေ့မှာ မြစ်ကြီးနားမြို့ကိုစာမေးပွဲသွားရောက်ဖြေဖို့အတွက် ပို့ပေးလိုက်ပြီလို့ သိရပါတယ်။
တစ်ခြားကျန်တဲ့ အတန်းက ကျောင်းသူကျောင်းသားတွေကတော့ တိုက်ပွဲမဖြစ်ခင် ရှေ့တစ်ရက်ကပဲ ဖြေဆိုပြီးသွားကြပြီဖြစ်ပေမဲ့ သူတို့ရဲ့ အဖြေလွှာတွေကို တိုက်ပွဲကာလအတွင်း ဘယ်လိုစီစဉ်ဆောင်ရွက်ထားသလဲဆိုတာ မသိရတာကြောင့် းရိမ်နေကြတယ်လို့လည်းဒေသခံတွေရဲ့ ပြောကြားချက်အရ သိရပါတယ်။
လွန်ခဲ့တဲ့ ဖေဖော်ဝါရီလ ၁၀ ရက်နေ့မှာ KIA ပူးပေါင်းတပ်ဖွဲ့တွေက ဆင်ဘိုမြို့ကို တိုက်ခိုက်သိမ်းပိုက်ခဲ့ပြီး စစ်ကောင်စီဘက် လေယာဉ်တွေနဲ့ ပြန်လည်တိုက်ခိုက်မှုတွေရှိတဲ့အတွက် ဒေသခံပြည်သူတွေဟာ ဘေးလွတ်ရာကို တိမ်းရှောင်သွားကြတာ ဖြစ်ပါတယ်။
ဆင်ဘိုဒေသခံတချို့ကတော့ မြို့ထဲမှာပဲ ဆက်လက်နေထိုင်နေကြပြီး တချို့က ဗန်းမော်မြို့မြစ်ကြီးနားမြို့တွေမှာ တိမ်းရှောင်သွားကြသလို့ တချို့ကတော့ ဆင်ဘိုမြို့တစ်ဝိုက်က နီးစပ်ရာ တောတွေနဲ့အခင်းတွေထဲမှာ သွားရောက်တိမ်းရှောင်နေကြရတယ်လို့ ကြားသိရပါတယ်။
လွန်ခဲ့တဲ့ဖေဖော်ဝါရီလ ၂၄ ရက်နေ့မှာလည်း KIA ပူးပေါင်းတပ်ဖွဲ့တွေဟာ ဆင်ဘိုအခြေစိုက် ခမရ ၁၄၁ စခန်းကို မနက် ၇ နာရီလောက်မှာ သွားရောက်တိုက်ခိုက်တဲ့အတွက် စစ်ကောင်စီတပ်ရဲ့ လေယာဉ်တစ်စီးလာပြီး ဗုံးနှစ်ကြိမ်ကြဲချသွားခဲ့တယ်လို့လည်း သိရပါတယ်။
