ဇွန်၊၁၃
ကချင်ပြည်နယ်၊ မိုးညှင်းခရိုင်၊ အင်းတော်ကြီးဒေသက လုံးတုံစစ်တပ်ထဲကို စစ်ကြောင်းတိုးချဲ့ဝင်ရောက်မှုတွေ ရှိနေတာကြောင့် ဒေသခံပြည်သူတွေ တိုက်ပွဲဖြစ်ပွားလာမှာကို စိုးရိမ်နေကြတယ်လို့ သိရပါတယ်။
မိုင်းနောင်ကျေးရွာအနောက်ဘက် ကျောက်ဆင်ကုန်းနေရာမှာ နှစ်ဖက်တပ် ထိတွေ့တိုက်ပွဲ ဖြစ်ပွားခဲ့ပြီးတဲ့နောက် ဖားကန့်ကနေ လုံးတုံစစ်တပ်ထဲကို အင်အားနှစ်ရာဝန်းကျင်ခန့် ဝင်ရောက်လာတဲ့အတွက် ဒေသခံတွေကြောက်လန့်ပြီး ကျောင်းတွေပိတ်ထားကြတယ်လို့ ဒေသခံတစ်ဦးက မြစ်ကြီးနားသတင်းဂျာနယ်ကို ပြောပါတယ်။
“ ဟိုတစ်နေ့က ပစ်ခတ်ကြပြီးတဲ့နောက် ရွာထဲမှာ အများကြီးထပ်ရောက်နေကြတယ်။ ပစ်ခတ်လာမှာကို ကြောက်လို့ မိဘတွေနဲ့ ဆရာ၊ ဆရာမတွေက ကျောင်းပိတ်ထားကြတာ။စစ်ကြောင်းတွေ ပတ်ဝန်းကျင်မှာ မလှုပ်ရှားတော့တဲ့အထိ ပိတ်ထားမှာပေါ့။ “ လို့ ဆိုပါတယ်။
စစ်ကောင်စီရဲ့ စစ်ရေးလှုပ်ရှားမှုတွေကြောင့် လုံးတုံ ကျေးရွာ မမုံကိုင်ကျေးရွာ နဲ့ မိုင်းနောင်ကျေးရွာ ဒေသခံတွေ စိုးရိမ်နေကြတယ်လို့ ဆိုပါတယ်။
ကချင်လွတ်လပ်ရေးတပ်မတော် KIA တပ်မဟာ(၉) လက်အောက်ခံ တပ်ရင်း(၂၆) ရဲ့လှုပ်ရှားနယ်မြေဖြစ်တဲ့ အဲဒီဒေသမှာ ဇွန်လ(၁၀)ရက်နေ့က လုံးတုံကျေးရွာကနေ မိုင်းနောင်ကျေးရွာကို လှုပ်ရှားဝင်ရောက်လာတဲ့ စစ်ကောင်စီတပ်ဖွဲ့ဝင်တွေနဲ့ KIA , PDF ပူးပေါင်းတပ်ဖွဲ့တို့ တစ်နာရီကြာတိုက်ပွဲဖြစ်ပွားခဲ့ကြပြီး ထိခိုက်မှုတွေ ရှိခဲ့တယ်လို့လည်း သိရပါတယ်။
