မတ်၊၄
စစ်ကောင်စီတပ်ရင်းသုံးခု စခန်းချနေထိုင်တဲ့ ဗန်းမော်ခရိုင်၊ မံစီမြို့နယ်က Maji Gung(မဂျီဂုန်) ဗျူဟာကုန်းကို ကချင်လွတ်လပ်ရေးတပ်မတော်(KIA) ကနေ့ မတ်လ ၃ ရက်နေ့မှာ တိုက်ခိုက်သိမ်းပိုက်နိုင်ခဲ့ပြီလို့ ကချင်လွတ်လပ်ရေးအဖွဲ့အစည်း (KIO/KIA)သတင်းနဲ့ ပြန်ကြားရေးတာဝန်ခံ ဗိုလ်မှူးကြီးနော်ဘူက အတည်ပြုပြောဆိုပါတယ်။
စစ်ကောင်စီတပ်ရင်း ခလရ၁၀၂၊ ခလရ ၂၅၀၊ ခမရ ၄၂၇ တပ်ရင်း ၃ ခု အထိုင်စခန်းချနေထိုင်တဲ့ အဲဒီဗျူဟာကုန်းကို KIAဘက်က မတ်လ ၁ ရက်နေ့ကနေ စတင်ထိုးစစ်ဆင်တိုက်ခိုက်ပြီး မတ်လ ၃ ရက်နေ့ ညနေပိုင်းမှာအပြီးသိမ်းပိုက်နိုင်ခဲ့တာလို့ ဗိုလ်မှူးကြီးနော်ဘူက မြစ်ကြီးနားသတင်းဂျာနယ်ကို အခုလို ပြောပါတယ်။
“မဂျီဂုန်ကို မတ်လ ၁ရက်နေ့ကနေ စပစ်တယ်။ သုံးရက်လောက်ပစ်ပြီး တိုက်ခိုက် သိမ်းပိုက်နိုင်ခဲ့တာပေါ့။“လို့ ဗိုလ်မှူးကြီးနော်ဘူက ဆိုပါတယ်။
ဒါ့အပြင် တိုက်ပွဲအတွင်း စစ်ကောင်စီတပ်ရဲ့ လက်နက်ကြီး/ငယ် အများအပြားသိမ်းပိုက်နိုင်ခဲ့ပြီး လက်နက်အမျိုးအစား ဘယ်လောက်သိမ်းနိုင်ခဲ့တယ်ဆိုတဲ့ စာရင်းအတိအကျကိုတော့ မသိရှိရသေးဘူးလို့လည်း ဗိုလ်မှူးကြီးနော်ဘူက ပြောပါတယ်။
တစ်ဆက်တည်းမှာပဲ နှစ်ဖက်တပ် ထိခိုက်ကျရှုံးမှုနဲ့ ပတ်သက်ပြီး မေးမြန်းရာမှာတော့ နှစ်ဖက်တပ်ထိခိုက်ကျရှုံးမှုတွေရှိပေမဲ့ အတိအကျတော့ မသိရှိရသေးဘူးလို့လည်း ထပ်မံဖြေကြားပါတယ်။
ဖေဖော်ဝါရီလ ၁၉ ရက်နေ့ရက်နေ့ကလည်း မံစီမြို့နယ်၊ စီခမ်းကြီးကျေးရွာမှာရှိတဲ့ စစ်ကောင်စီတပ်ရဲ့ အထိုင်တပ်စခန်းကို ကချင်လွတ်လပ်ရေးတပ်မတော် (KIA)နဲ့ ပူးပေါင်းတပ်တို့က တိုက်ခိုက်သိမ်းပိုက် လိုက်ပါတယ်။
၂၀၂၄ ခုနှစ် နှစ်စပိုင်းမှာပဲ KIA စစ်ကောင်စီကောင်စီတို့ကြား တိုက်ပွဲတွေ ဆက်တိုက်ပြင်းထန်နေပြီး KIA ကနေ စခန်းသိမ်းတိုက်ပွဲတွေ ပြုလုပ်လာတာကိုလည်း တွေ့ရပါတယ်။
