ဖေဖော်ဝါရီ၊ ၂၈
ကချင်ပြည်နယ်၊ ဟိုပင်မြို့နယ်၊ နန့်ရင်းကျေးရွာဘက်မှာ စစ်ကောင်စီ SNA ပူးပေါင်းတပ်တွေနဲ့ ပြည်သူ့ကာကွယ်ရေးတပ်တို့ ဒီကနေ့ မနက် ၉ နာရီဝန်းကျင်လောက်ကနေ တိုက်ပွဲဖြစ်ပွားနေတယ်လို့ သိရပါတယ်။
ရှမ်းနီ SNA တပ်နဲ့ စစ်ကောင်စီ တပ်ရင်း ၄၀ ဘက်က အင်အားရာပိုင်းနဲ့ နန့်ရင်းကျေးရွာဘက် စစ်ကြောင်းထိုးလာပြီး နန့်ရင်းရွာ အရှေ့ဘက်ကို လက်နက်ကြီးတွေ ပစ်ခတ်တာကြောင့် အပြန်အလှန် လက်နက်ကြီးတွေနဲ့ ပစ်ခတ်မှုဖြစ်ပွားခဲ့တယ်လို့ ဟိုပင်ပြည်သူ့ကာကွယ်ရေး တပ်ဖွဲ့ဝင်တစ်ဦးက မြစ်ကြီးနားသတင်းဂျာနယ်ကို ပြောပါတယ်။
“ရှမ်းနီဘက်က အရင်ထိုးစစ်ဆင်တာပေါ့။ဟိုဖက်ကမ်းကနေ ရွာကိုကာဗာယူပြီးတော့ လက်နက်ကြီးတွေနဲ့ထုတယ်။ အဓိကအားဖြင့် ဟိုဖက်က လက်နက်ကြီးပစ်တယ်။ ဒီဘက်က လက်နက်ကြီးပစ်တယ် အဲဒီလိုမျိုးပေါ့။“လို့ ဆိုပါတယ်။
ပြည်သူ့ကာကွယ်ရေးတပ်ဖွဲ့ဘက်က ထိခိုက်မှုမရှိပေမဲ့ တစ်ဖက်တပ်ဘက်ကတော့ ၃ ဦးကျဆုံးပြီး ထိခိုက်မှုတွေရှိတာကြောင့် မြို့ထဲက လူနာတင်ယာဉ်နဲ့ လာသယ်သွားတယ်လို့ ရှေ့တန်းသတင်းအရ သိရကြောင်း ဆိုပါတယ်။
နန့်ရင်းကျေးရွာတစ်ဝိုက်က ဒေသခံပြည်သူတွေကတော့ မြို့ထဲဘက်မှာ လာရောက်တိမ်းရှောင်နေကြပြီး လက်နက်ကြီး ပစ်ခတ်မှုတွေကြောင့် ဟိုပင်မြို့ထဲမှာလည်း ဆိုင်တွေပိတ်ပြီး အသွားအလာ ခြောက်ကပ်သွားတယ်လို့ ဟိုပင်ဒေသခံတစ်ဦးကလည်း အခုလို ပြောပါတယ်။
” မနက်ကလည်း ဈေးလည်း အစောကြီးတွေ သိမ်းကုန်ကြတယ်လေ။ မြို့ထဲက ဆိုင်ကြီးတွေလည်း ပိတ်ကုန်ကြတာ။” လို့ ဒေသခံက ဆိုပါတယ်။
ရှမ်းနီတပ်သားတွေဟာ ဟိုပင်မြို့ထဲက ဘုန်ကြီးကျောင်းကနေ လက်နက်ကြီးပစ်ခတ်မှုတွေ လုပ်ဆောင်နေတာဖြစ်ပြီး ကျေးရွာဘက် လက်နက်ကြီးကျတယ်လို့ သိရကြောင်းလည်း ဆိုပါတယ်။
စစ်ကောင်စီနဲ့ SNA ပူးပေါင်းတပ်သားတွေဟာ ပြီးခဲ့တဲ့ ဖေဖော်ဝါရီလ ၂၅ ရက်နေ့ကလည်း နန့်ရင်းကျေးရွာဘက်ကို စစ်ကြောင်းထိုးပြီးတော့ နန့်ရင်းချောင်းကူးတံတားကို ဖြတ်သန်းလို့မရအောင် လမ်းပိုင်းမြေကို ဘက်ဟိုးနဲ့ကော်ပြီး ကျင်းတူးဖျက်ဆီးတာလည်း ရှိခဲ့ပါတယ်။
ဓါတ်ပုံ- Hopin KPDF
