ဇူလိုင်၊၇
ကချင်ပြည်နယ်၊ မိုးညှင်းမြို့နယ်အတွင်းက တောင်သူတွေအနေနဲ့လယ်ယာမြေလုပ်ပိုင်ခွင့်လက်မှတ်၊ ပုံစံ(၇) ချပေးဖို့ စစ်ကောင်စီခန့် ပြည်နယ်ဝန်ကြီးချုပ်ဆီကို စာတင်ခဲ့ပေမယ့်ထပ်မံစာတင်ဖို့ အကြောင်းလာပါတယ်။
မိုးညှင်းမြို့နယ်ရှိ ကျေးရွာ ၁၂ ရွာက တောင်သူတွေ လုပ်ကိုင်နေတဲ့ လယ်တွေကို သက်ဆိုင်ရာအစိုးရဌာနက အမြန်ဆုံးချပေးဖို့ တင်ပြထားတဲ့စာကို ထပ်မံ စာတင်စေလိုကြောင်း အကြောင်းကြား လာတယ်လို့ညောင်ကုန်းကျေးရွာ တောင်သူတစ်ဦးက မြစ်ကြီးနားသတင်းဂျာနယ်ကို ပြောပါတယ်။
“မြစ်ကြီးနားကို ကျွန်တော်တို့အဖွဲ့ကသွားပြီးတော့ မေးတော့အခုက ပြည်နယ်ဝန်ကြီးချုပ်ကပြောတယ်တဲ့ စာမတင်ထားဘူးလို့ပြောခဲ့ဘူး၊ စာပြန်တင်ပေးပါလို့ပြန်မှာတယ်တဲ့၊”လို့ ဆိုပါတယ်။
မြေနေရာတွေကို တောင်သူတွေ ၁၀ နှစ်ကျော်ကြာအကောင်အထည်ဖော် လုပ်ကိုင်နေတာသေချာခဲရင် ပုံစံ (၇) လုပ်ပိုင်ခွင့်ရရှိတယ်လို့ ဥပဒေမှာ ပါရှိပြီးဖြစ်တဲ့အတွက်ကြောင့်တောင်းဆိုရတာဖြစ်တယ်လို့သိရပါတယ်။
တောင်သူတွေအနေနဲ့ ပုံစံ(၇) ရရှိခဲ့ရင် အစိုးရဘဏ်ချေးငွေတွေ ရရှိလာနိုင်တဲ့အပြင်သားစဉ်မြေးဆက် လက်ဆင့်ကမ်းတဲ့အချိန် စိတ်အေးမှုလည်း ရရှိနိုင်မှာဖြစ်လို့တယ်လို့လည်း မော်ဟန်ကျေးရွာတောင်သူတစ်ဦးက ပြောပါတယ်။
အပြင်မှာချေးမယ်ဆိုရင် အာမခံချက်အနေနဲ့ ပိုင်ဆိုင်မှုစာရွက်စာတမ်း ပေးထားနိုင်မှ ၁၀ ကျပ်တိုးလောက်နဲ့ ချေးယူနိုင်ပြီး အဲဒီငွေပမာဏဟာ လယ်စိုက်ပျိုးတဲ့ တောင်သူတွေရဲ့ဘဝကို တိုးတက်လာမယ့်အခြေအနေဘက်ကိုမဟုတ်ဘဲ၊ ကြာလေနစ်မြုပ် လေဖြစ်ရတယ်လို့တောင်သူ အမျိုးသားတစ်ဦးကပြောပါတယ်။
လက်ရှိအချိန်မှာ သစ်တောကြိုးဝိုင်းက ဆယ်မိုင် ၅၀၂ ဧက ၊ သာယာကုန်းနဲ့ ညောင်ကိုင်း ၁၂၉၈ဧက၊ ဟဲလုံ ၆၀၉ ဧက၊ ပင့်ဟဲ ၂၇၉ ဧက၊ ပင့်သာ ၇၁၄ ဧက စတဲ့ ကျေးရွာတွေကိုတိုင်းတာပြီးစီခဲ့ပြီ ဖြစ်ပေမယ့် နောက်ထပ်တိုင်းတာဖို့ ကျန်ရှိနေတဲ့ ကျေးရွာတွေဖြစ်တဲ့မော်ဟန်၊ နန့်စီးအောင်၊ နန့်ပုတ်၊ သာစီ၊ အိုးစံဆိုင်နဲ့ ဘီလူး ကျေးရွာတို့ကိုလည်းအမြန်ဆုံးလာရောက် တိုင်းတာပေးကြဖို့လည်း တောင်သူတွေက တောင်းဆိုနေကြပါတယ်။
၂၀၁၉ ခုနှစ်အတွင်း စာရင်းပြုစုထားချက်အရ ကျေးရွာပေါင်း ၁၂ ရွာမှာ တောင်သူ ၁၀၅၈ဦးလုပ်ကိုင်နေတဲ့ လယ်ဧကပေါင်း ၆၂၉၀ ရှိတယ်လို့ သိရပါတယ်။
ပုံဟောင်းဖြစ်ပါသည်
