မတ်၊ ၂၀
ရက္ခိုင့်တပ်တော် (AA) သိမ်းပိုက်ထားတဲ့ ရခိုင်ပြည်နယ်၊ မင်းပြားမြို့နယ်က မူဆလင်ကျေးရွာကို စစ်ကောင်စီက ဗုံးကြဲခဲ့တာကြောင့် ကလေး ၁၁ ယောက်အပါအဝင် လူပေါင်း ၂၂ ယောက် အစုလိုက်အပြုံလိုက် သေဆုံးမှု ဖြစ်ပွားခဲ့တယ်လို့ AA က မနေ့က ညပိုင်းမှာ ထုတ်ပြန်ခဲ့ပါတယ်။
စစ်ကောင်စီဟာ မတ်လ ၁၈ ရက်နေ့မနက် ၁ နာရီကျော်က တိုက်လေယာဉ်တစ်စီးနဲ့ မင်းပြားမြို့နယ်၊ သာဒါ (မူဆလင်) ကျေးရွာကို ဗုံးကြဲခဲ့တာကြောင့် ပြည်သူ ၂၁ ယောက် ပွဲချင်းပြီးသေဆုံးပြီး နောက်တစ်ယောက်ကတော့ AA က ဆေးကုသပေးနေချိန် ထပ်သေဆုံးသွားတာလို့ ဆိုပါတယ်။
သေဆုံးသူတွေဟာ သာဒါကျေးရွာက ၁၀ ယောက်နဲ့ အဲဒီကျေးရွာကိုစစ်ဘေးလာရှောင်တဲ့ ဆင်ကြီးပြင်ကျေးရွာက ၁၂ ယောက်ဖြစ်တယ်လို့ သိရပါတယ်။
သေဆုံးသူတွေအားလုံးဟာ အမျိုးသားတွေဖြစ်ပြီး အဲဒီထဲမှာ အသက် ၅၇ အရွယ်ကနေ အသက် ၁ နှစ်အရွယ်ထိ ပါဝင်ပြီးတော့ ဒဏ်ရာရသူစုစုပေါင်း ၂၉ ယောက်ထိရှိတယ်လို့ AA က ဖော်ပြထားတဲ့ စာရင်းတွေအရ သိရပါတယ်။
ဒါ့အပြင် စုစုပေါင်းဒဏ်ရာရသူ ၂၉ ယောက်ထဲမှာလည်း ကလေးငယ် ၁၁ ယောက်ပါဝင်ပြီး သူတို့တွေကိုတော့ AA က ဆေးကုသပေးနေတယ်လို့ ဆိုပါတယ်။
“အကြမ်းဖက်စစ်ကောင်စီ၏ ယခုကဲ့သို လူမျိုးရေးအမုန်းတရားများကို အခြေခံပြီး စစ်ရေးပစ်မှတ်မဟုတ်သော အပြစ်မဲ့ပြည်သူများအား အစုလိုက်အပြုံလိုက် နေ့စဉ်တိုက်ခိုက် သတ်ဖြတ်နေခြင်းမှာ လူသားမျိုးနွယ်အပေါ် ပြစ်မှုကျူးလွန်ခြင်းနှင့် စစ်ရာဇဝတ်မှုများကို ပြောင်ပြောင်တင်းတင်း ကျူးလွန်နေခြင်းပင်ဖြစ်သည်။” လို့လည်း AA က ထုတ်ပြန်ချက်မှာ ဖော်ပြထားပါတယ်။
ဒါ့အပြင် ရခိုင်မှာစစ်ရှုံးနေတဲ့ စစ်ကောင်စီဟာ ပြည်သူတွေနဲ့သက်ဆိုင်တဲ့နေရာတွေ၊ ရှေးဟောင်းအမွေအနှစ် နေရာတွေကို ကုန်းကြောင်း၊ ရေကြောင်း၊ လေကြောင်းတို့ကနေ ပစ်ခတ်တိုက်ခိုက်မှုကို တစ်ရက်ထက်တစ်ရက် မိုက်ရူးရဲဆန်ဆန် ပိုပြုလုပ်လာနေတယ်လို့လည်း AA ရဲ့ ထုတ်ပြန်ချက်အရ သိရပါတယ်။
အာဏာသိမ်းပြီးတဲ့နောက် တခြားပြည်နယ်နဲ့တိုင်းတွေမှာလည်း စစ်တပ်ဟာ လေကြာင်းကနေ စာသင်ကျောင်းတွေကို ဗုံးကြဲခဲ့တာကြောင့် ကလေးတွေ အစုလိုက်အပြုံလိုက် သေဆုံးခဲ့တဲ့ဖြစ်စဉ်တွေလည်း ရှိနေပါတယ်။
