ဇူလိုင်၊၂၁
စစ်ရေးတင်းမာမှုတွေကြောင့် ကချင်ပြည်နယ်၊ ဗန်းမော်ခရိုင်၊ဒေါ့ဖုန်းယန်မြို့ဘက် ထွက်ပြေးတိမ်းရှောင်လာတဲ့ ဒင်ဂါနဲ့ နောင်ဝမ့်ရွာက ဒေသခံတွေကို နှစ်ရက်အတွင်း ရွာထဲက ပစ္စည်းတွေအပြီးသယ်ယူဖို့ စစ်ကောင်စီတပ်က ပြောကြားထားတယ်လို့ သိရပါတယ်။
တိမ်းရှောင်ခဲ့ပြီးတဲ့နောက် ရွာထဲမှာကျန်ရှိနေသေးတဲ့ ပစ္စည်းတွေကို ဇူလိုင်လ ၂၂ ရက်နေ့အပြီး လာရောက်သယ်ယူဖို့ စစ်ကောင်စီတပ်ဘက်က ပြောကြားထားတဲ့အတွက် ဒေသခံတွေ သယ်ယူနေကြပြီလို့ ဒေါ့ဖုန်းယန်ဒေသခံပြည်သူတစ်ဦးက မြစ်ကြီးနားသတင်းဂျာနယ်ကို အခုလို ပြောပါတယ်။
” ပစ္စည်းတွေအပြီး ရွှေ့ခိုင်းနေတယ်။ ခုရွှေ့နေကြပြီ”လို့ ဒေသခံက ပြောပါတယ်။
ဇူလိုင်လ ပထမပတ်ကနေစပြီး ဒေါ့ဖုန်းယန်မြို့ အနီးတစ်ဝိုက် နှစ်ဖက်တပ် လက်နက်ကြီး/ငယ် ပစ်ခတ်သံတွေ သိသိသာသာကြားလာရတဲ့အတွက် စစ်ကောင်စီတပ်ရဲ့ နယ်မြေနဲ့ နီးကပ်တဲ့ ဒင်ဂါနဲ့ နောင်ဝမ့်ရွာသားတွေဟာ တစ်မိုင်ကျော်လောက်ဝေးတဲ့ ဒေ့ါဖုန်းယန်မြို့ဘက်ကို ဇူလိုင်လ ၁၆ ရက်နေ့ကနေစပြီး စတင်ထွက်ပြေးခိုလှုံခဲ့ကြတာပါ။
ဒါ့အပြင် ဇူလိုင်လ၂၀ ရက်နေ့ ည ၈ နာရီခွဲအချိန်လောက်ကလည်း ကချင်လွတ်လပ်ရေးမတော်(KIA) ဘက်ကနေ စစ်တပ်ဘက်ကို ဒရုန်းနဲ့ ဗုံးကြဲတိုက်ခိုက်တာတွေ ရှိခဲ့ပြီးတဲ့နောက် စစ်ကောင်စီဘက်ကနေ လက်နက်ကြီး ၇ ချက်လောက် ပြန်လည်ပစ်ခတ်ခဲ့တဲ့တယ်လို့လည်း ဆိုပါတယ်။
လက်ရှိ စစ်ရေးအခြေအနေတွေကြောင့် ဒေါ့ဖုန်းယန်မြို့ဘက်ကို ဒင်ဂါနဲ့ နောင်ဝမ့်ရွာတွေဘက်က ဒေသခံ အယောက်၂၀၀လောက် ရောက်ရှိနေပြီဖြစ်ပြီး ဘုရားကျောင်းမှာ နေရာထိုင်ခင်း စီစဉ်ပေးထားတယ်လို့လည်း ကြားသိရပါတယ်။
အထက်ပါ ဒေါ့ဖုန်းယန်ဒေသခံရဲ့ ပြောပြချက်အရ ရပ်ရွာလူကြီးတွေအားလုံးကို ဒေါ့ဖုန်းယန်မြို့က စစ်ကောင်စီတပ်ရင်းမှူးကနေ အစည်းအဝေးခေါ်ထားတယ်လို့လည်း သိရပြီး ဘာကြောင်းကြောင့် ဆိုတာကိုတော့ မသိရှိရသေးပါဘူး။
ဒေါ့ဖုန်းယန်မြို့ဟာ မြစ်ကြီးနား-ဝိုင်းမော်-ဗန်းမော်လမ်းပေါ်မှာ တည်ရှိပါတယ်။
ဓါတ်ပုံ- ပုံဟောင်းအသုံးပြုထားပါသည်။
