ဇူလိုင်၊၂၁
ကချင်ပြည်နယ်၊ ဝိုင်းမော်မြို့နယ်၊ ဝါးရှောင် ကျေးရွာနဲ့ နှစ်မိုင်လောက်ဝေးတဲ့ နန်ဇော်ယန်ကျေးရွာဘက်သွားတဲ့လယ်ကွင်းတစ်နေရာမှာ ကချင်လွတ်လပ်ရေးတပ်မတော်(KIA)နဲ့ စစ်ကောင်စီ ပူးပေါင်းတပ်တို့ ဒီကနေ့မနက်(၉)နာရီလောက်က ထိတွေ့တိုက်ပွဲ ဖြစ်ပွါးနေပြီး လက်ရှိချိန်ထိ ပစ်ခတ်သံတွေ ကြားနေရတယ်လို့ သိရပါတယ်။
KIAနဲ့ စစ်ကောင်စီ၊ ပြည်သူ့စစ် ပူးပေါင်းတပ်တွေနဲ့ တစ်နာရီနီးပါး ပစ်ခတ်မှု ဖြစ်ပွားခဲ့ပြီး စစ်ကာင်စီလက်အောက်ဂေါ်ဆက်ယန် စုပေါင်းဂိတ်ကနေလည်း လက်နက်ကြီးတွေ ပစ်ကူခဲ့တယ်လို့ ဒေသခံတစ်ဦးက မြစ်ကြီးနားသတင်းဂျာနယ်ကို အခုလို ပြောပါတယ်။
“ဝါရှောင်ကနေ (၂)မိုင်လောက်ဝေးတဲ့ လယ်ကွင်းနားမှာ ဟုတ်တယ်။ (၉)နာရီကနေ စပြီ။ စစ်တပ်၊ ပြည်သူ့စစ်တွေနဲ့ပေါ့။ ဂေါ်ဆက်ယန် ဂိတ်ကနေလည်း ပစ်ကူနေတယ်“လို့ ဒေသခံက ဆိုပါတယ်။
ဒေသခံတစ်ဦးရဲ့ ပြောပြချက်အရ စစ်ကောင်စီတပ်နဲ့ ပြည်သူ့စစ် တပ်ပေါင်းစုတွေဟာ ဝိုင်းမော် အရှေ့ဘက်တစ်ကြော နေရာယူ စစ်ရေးလှုပ်ရှားမှုတွေ ရှိနေပြီး အင်အား(၄၀၀)ထက်မနည်း ရှိနိုင်တယ်လို့လည်း ပြောပါတယ်။
ဝိုင်းမော်မြို့နယ်၊ ဝါးရှောင်ကျေးရွာအနီး နန်ဇော်ယန်ကျေးရွာဘက် လက်ရှိကချင်လွတ်လပ်ရေးတပ်မတော် (KIA) နဲ့ စစ်ကောင်စီတပ်ဖွဲ့၊ ပြည်သူ့စစ်အဖွဲ့တို့အကြား ဇူလိုင်လ(၁၀)ရက်နေ့ကနေ တိုက်ပွဲတွေဖြစ်ပွါးနေပြီးတော့လက်ရှိအချိန်အထိ စစ်ရေးတင်းမာမှုတွေ ရှိနေဆဲလည်း ဖြစ်ပါတယ်။
