ဇန်နဝါရီ၊၂၁
ကချင်ပြည်နယ်၊ မြစ်ကြီးနားမြို့မှာ စစ်ကောင်စီတပ်ဖွဲ့ဝင်၊ ရဲတပ်ဖွဲ့ဝင်တွေနဲ့ ယာဥ်ထိန်းရဲတွေ စုပေါင်းပြီး လိုင်စင်မဲ့ကားနဲ့ ဆိုင်ကယ်တွေကို ဖမ်းဆီးနေတယ်လို့ သိရပါတယ်။
ဒီကနေ့မနက်ပိုင်းကနေစတင်ပြီး ဗလမင်းထင်တံတားအပေါ်နဲ့ အောက်လမ်းမှာ ကားနဲ့ဆိုင်ကယ်တွေ ဖမ်းဆီးနေပြီး တံတားဖြတ်မယ့်သူတွေကို အဓိကထား ဖမ်းဆီးနေတယ်လို့ အင်ဂျန်ဒုံရပ်ကွက်ကနေ စီတာပူရပ်ကွက်ဘက်ကို ပြန်လာတဲ့ ဒေသခံအမျိုးသမီးတစ်ဦးက ပြောပါတယ်။
” ကျွန်မက အင်ဂျန်ဒုံကနေပြန်လာတာ။ တံတားကုန်းဆင်းမှာ ဖမ်းတာလားဆိုပြီး ကြောက်နေတာ။ တံတားဖြတ်မယ့်သူတွေကို စစ်နေတာ။ ဆိုင်ကယ်လည်းဖမ်းတယ်။ကားကတော့ သူတို့လိုချင်တာ ရွေးဖမ်းတာထင်တယ်” လို့ ပြောပါတယ်။
” မြို့ထဲသွားစရာရှိလို့ အေးမြသာယာဘက်ကသွားတာ ရဲနဲ့စစ်သားတွေ လက်နက်အပြည့်နဲ့စောင့်နေကြတယ်။ မြို့ထဲမှာ ဒီနေ့က ကားတောင်တော်တော်ရှင်းသွားတယ်။ ဘယ်သူမှသိပ်မထွက်ကြတော့ဘူး” လို့ပြောပါတယ်။
ဗလမင်းထင်တံတားအောက်မှာ အိမ်စီးကားသုံးစီး ဖမ်းထားတာတွေ့ရပြီး ဆိုင်ကယ်တွေကိုတော့ ဖြတ်သန်းခွင့်ပြုထားတယ်လို့ အထက်ပါအမျိုးသားက ဆက်လက်ပြောပါတယ်။
