စက်တင်ဘာ၊၂၀
ကချင်ပြည်နယ်၊ မြစ်ကြီးနား – ဖားကန့်သွားလမ်း ပေါ်မှာရှိတဲ့ နမ့်ယာကျေးရွာနေ ရှမ်းနီပြည်သူ့စစ်ခေါင်းဆောင်တစ်ဦးဖြစ်သူ ဦးထွန်းထွန်း ဆိုသူဟာ သေနတ်နဲ့ ပစ်ခတ်ခံရပြီး သေဆုံးခဲ့တယ်လို့ သိရပါတယ်။
ဒီကနေ့မနက်အစောပိုင်းမှာ ဦးထွန်းထွန်းဟာ တပ်စခန်းကုန်းကနေ နမ့်ယားကျေးရွာ ရပ်ကွက် (၁) မှာရှိတဲ့ သူ့ရဲ့နေအိမ်ကိုပြန်လာတဲ့အချိန် နေအိမ်အဝင်ဝနားမှာ ပစ်ခတ်ခံရတာဖြစ်တယ်လို့ နမ့်ယားကျေးရွာ ဒေသခံအမျိုးသားတစ်ဦးက မြစ်ကြီးနားသတင်းဂျာနယ်ကို ပြောပါတယ်။
” ဟုတ်တယ်။ ဒီမနက် ၇ နာရီခွဲလောက် မှာ။ သူကတပ်စခန်းကုန်းမှာ သွားအိပ်ပြီးတော့ ဆင်းလာတဲ့အချိန် အိမ်အဝင်ဝနားမှာ ဘယ်သူတွေလဲတော့မသိဘူး လာပစ်သွားတာ။ ဦးထွန်းထွန်းတဲ့။ ရှမ်းနီခေါင်းဆောင်ဟုတ်တယ်” လို့ဒေသခံက ပြောပါတယ်။
အဲဒီဖြစ်စဉ် ဖြစ်ပွားပြီးတဲ့နောက်မှာတော့ ပြည်သူ့စစ်အဖွဲ့တွေဟာ သူတို့ရဲ့ စခန်းကုန်း ကနေ သေနတ်ပစ်ဖောက်ဆင်းလာပြီး လက်နက်ကြီးတွေလည်းရမ်းသမ်းပစ်ခတ်ခဲ့တယ်လို့ ဒေသခံ အမျိုးသမီးတစ်ဦးကလည်း အခုလိုပြောပါတယ်။
” သူတို့စခန်းကုန်းကနေ လိုက်ဆင်းလာပြီးပစ်တယ်။လက်နက်ငယ်သံတော့ တော်တော်ပစ်တယ်။ခင်တောင်( hkin tau) ရွာဘက်ကိုလဲ တော်တော်လေးပစ်ပေးတယ်တဲ့” လို့ ဆိုပါတယ်။
ရှမ်းနီပြည်သူ့စစ်အဖွဲ့တွေဟာ နမ့်ယားကျေးရွာမှာ ဂိတ်စခန်းထိုင်ထားတာဖြစ်ပြီး ဖြတ်သွား/လာတွေကို စစ်ဆေးမေးမြန်းတာတွေ၊ ဆိုင်ကယ်နဲ့လာတဲ့ ခရီးသွားတွေကို ဆိုင်ကယ်ဆင်းတွန်းခိုင်းတာတွေနဲ့ မသင်္ကာသူတွေကို ရှာဖွေစစ်ဆေးတာတွေ လုပ်နေတဲ့ ဂိတ်စခန်းတစ်ခုဖြစ်တယ်လို့လည်း ဒေသခံတွေက ဆိုပါတယ်။
အထက်ပါ ဖြစ်စဉ်ပတ်သက်ပြီး ဦးထွန်းထွန်းကို ဘယ်အဖွဲ့အစည်းက ပစ်ခတ်သွားလဲ ဆိုတာတော့ တိတိကျကျ မသိရသေးပါဘူး။
ဓါတ်ပုံ – နမ့်ယားကျေးရွာ ရွာလယ်လမ်းမကြီးအား တွေ့ရစဉ်
ပုံဟောင်းဖြစ်ပါသည်။
