အောက်တိုဘာ၊၁
ကချင်အထူးဒေသ ၁ ၊ချီဖွေမြို့ကို ကချင်လွတ်လပ်ရေးတပ်မတော်(KIA)ကနေ တိုက်ခိုက်သိမ်းပိုက် နိုင်ခဲ့ပြီဖြစ်တဲ့အတွက် အုပ်ချုပ်ရေးစနစ်စတင်ဖို့ လုပ်ဆောင်နေပြီလို့ သိရပါတယ်။
မြို့အုပ်ချုပ်ရေးပိုင်းတွေနဲ့ ပညာရေးကဏ္ဍတွေကို KIO/KIA ရဲ့အုပ်ချုပ်ရေးစနစ်နဲ့ သွားနိုင်ဖို့ စီစဉ်တာတွေ ပြုလုပ်နေတယ်လို့ ချီဖွေဒေသမှာရှိတဲ့ KIA ထိပ်တန်းအရာရှိတစ်ဦးက မြစ်ကြီးနားသတင်းဂျာနယ်ကို ပြောပါတယ်။
“ကျွန်တော်တို့ KIO အစိုးရ ပညာရေးစနစ်နဲ့ ဖွင့်လှစ်သွားဖို့ အစီစဉ်ရှိတယ်။ အုပ်ချုပ်ရေးပိုင်းနဲ့ ပတ်သက်ပြီးတော့ အခုကစပြီး လုပ်ဆောင်နေပြီ။ အရင်ကရှိနေတဲ့ ရပ်ကျေးအုပ်ချုပ်ရေး စနစ်တွေကို ကျွန်တော်တို့ အုပ်ချုပ်ရေးစနစ်နဲ့ လက်တွေ့ဖော်ဆောင်သွားဖို့ စီစဉ်နေတယ်။“လို့ ဆိုပါတယ်။
လတ်တလောမှာ မြို့တွင်း KIA နဲ့ PDF တွေ နေရာယူထားလိုက်နိုင်ပြီ ဖြစ်တာကြောင့် ထွက်ပြေးတိမ်းရှောင်နေတဲ့ ပြည်သူတွေကို မြို့ကိုပြန်လာဖို့ ခေါ်ထားကြောင်းလည်း ဆက်လက်ပြောပါတယ်။
“အခုက သေနတ်သံတွေ မမြည်တော့ဘူး။ အဲဒါကြောင့်ပြန်လာကြပါဆိုပြီး ခေါ်တာမျိုးလုပ်နေကြပါတယ်။” လို့ အထက်ပါအရာရှိက ဆက်လက်ပြောပါတယ်။
ဒါပေမဲ့ စစ်ကောင်စီရဲ့ လေကြောင်းတိုက်ခိုက်မှုတွေကတော့ ရှိနေဆဲဖြစ်ပြီး ဗျူဟာကုန်းဘက်ကို ဒီကနေ့လယ်ပိုင်းမှာ ဗုံးလာကြဲသွားတယ်လို့ ကြားသိရပြီးတော့ အထိအခိုက်တော့ မရှိဘူးလို့လည်း သိရပါတယ်။
ချီဖွေမြို့ဘက်က အခြေအနေနဲ့ပတ်သက်ပြီး အသေးစိတ်သိရှိနိုင်ဖို့ KIO/KIA ပြန်ကြားရေးတာဝန်ခံ ဗိုလ်မှူးကြီးနော်ဘူကို ဒီကနေ့မနက်မေးမြန်းရာမှာတော့ အဆက်အသွယ် မရရှိသေးတဲ့အတွက် ဖြေကြားနိုင်ခြင်းမရှိသေးကြောင်း ပြန်လည်ပြောကြားပါတယ်။
လွန်ခဲ့တဲ့ စက်တင်ဘာ ၂၉ ရက်နေ့ကစပြီး ချီဖွေမြို့သိမ်းတိုက်ပွဲကို KIA၊PDF ပူပေါင်းတပ်ဖွဲတွေကနေ တိုက်ခိုက်ခဲ့ရာ မြို့မရဲစခန်းကို သိမ်းယူနိုင်ခဲ့ပြီး ၃၀ ရက်နေ့မှာတော့ ချီဖွေက စစ်ကောင်စီရဲ့ ပင်မအထိုင်တပ်စခန်းကြီးကို အပြီးတိုင် တိုက်ခိုက်သိမ်းယူနိုင်ခဲ့တာ ဖြစ်တယ်လို့လည်း ဗိုလ်မှူးကြီးနော်ဘူက မြစ်ကြီးနားသတင်းဂျာနယ်ကို ဖြေကြားထားပါတယ်။
ဆော့လော်မြို့ဘက်ကိုတော့ KIA နဲ့ PDF ပူးပေါင်းတပ်တွေအနေနဲ့ ဆက်လက်တိုက်ပွဲဝင်နေကြဆဲဖြစ်ပြီး မကြာခင်ရလဒ်ထွက်လာမယ်လို့ မျှော်လင့်ကြောင်း၊ ပန်ဝါဘက်ကိုတော့ မရောက်ရှိသေးပေမဲ့ ချီဖွေမြို့အထက် ၄ မိုင်အထိ KIA က ထိန်းချုပ်ထားနိုင်ပြီလို့လည်း သိရပါတယ်။
ဒါ့အပြင် ဝိုင်းမော်မြို့ကလွဲပြီး မြို့အရှေ့ဘက် (ဝိုင်းမော်- ချီဖွေလမ်းတစ်လျှောက်)ကတော့ KIO/KIA ရဲ့ ထိန်းချုပ်ဧရိယာအတွင်းမှာ ရှိနေပြီဖြစ်တယ်လို့လည်း သိရပါတယ်။
ကချင်နယ်ခြားစောင့်တပ်(NDAK) ဥက္ကဌ ဦးဇခုန်တိန့်ယိန်း ဦးဆောင်အုပ်ချုပ်ခွင့်ရ ဒေသတွေဖြစ်တဲ့ ချီဖွေမြို့အရှေ့ဘက် ဂမ်ခွန်းကျေးရွာ၊ ဖီမော်ကျေးရွာအနီးမှာ တပ်ရင်း ၁၀၀၁၊ ပန်ဝါဒေသ လုပြည်ကျေးရွာအနီးမှာ ၁၀၀၂၊ ဝိုင်းမော်မြို့နယ် ကန်ပိုက်တီမြို့အနီး ဝေါ်ချုံးဒေသမှာ ၁၀၀၃ ဆိုပြီးတော့ တပ်ရင်း ၃ ရင်း ဖွဲ့စည်းနေရာချထားတာဖြစ်ပြီး ကချင်အထူးဒေသ(၁) အဖြစ် သတ်မှတ်ထားတာလည်း ဖြစ်ပါတယ်။
ပြီးခဲ့တဲ့ စက်တင်ဘာလ ၂၆ ရက်နေ့မှာ စစ်ကောင်စီက ငြိမ်းချမ်းရေးအတွက်ဆိုပြီး တိုင်းရင်းသား တော်လှန်ရေး လက်နက်ကိုင်တပ်ဖွဲ့တွေ၊ စစ်ကောင်စီက အကြမ်းဖက်အဖွဲ့အစည်းအဖြစ် သတ်မှတ်ထားတဲ့ အဖွဲ့တွေနဲ့ ပြည်သူ့ကာကွယ်တပ်ဖွဲ့ (PDF) တွေကို လက်နက်ကိုင် လမ်းစဉ်စွန့်လွတ်ပြီးတော့ ပါတီနိုင်ငံရေးလမ်းကြောင်း ဒါမှမဟုတ် ရွေးကောက်ပွဲလမ်းကြောင်းကနေ နိုင်ငံရေးပြဿနာကို နိုင်ငံရေးနည်းလမ်းနဲ့ ဖြေရှင်းကြဖို့ ထုတ်ပြန်ခဲ့ပြီးနောက် ၃ ရက်လောက်အကြာမှာပဲ KIA က ချီဖွေမြို့ကို သိမ်းပိုက်ခဲ့တာ ဖြစ်ပါတယ်။
