ဂျိမ်းဖောပွဲတော်နှင့် ဆရာမျိုးမြင့်ဆွေ

0
2413

“နေအရုဏ် အောင်လံစိုက်စေတော့ ဆွေအစုံတောင်ယံတဝှိုက်မှာ ဒေါင်မရေ.. ကလိုက်ချည့်သေး..။”ဟူသော ဂျိမ်းဖောပွဲတော်သီချင်း စာသားကို သီချင်းချစ်သူအများစုက သိကြသည်။ ပျော်ပျော်ရွှင်ရွှင်သီဆိုကြသည်။ သို့သော်ဆရာမျိုးမြင့်ဆွေအကြောင်းကိုသိသူတော့ နည်းပါလိမ့်မည်။ ဂျိမ်းဖော်ပွဲတော်သီချင်းကို ၁၉၇၀ ခန့်က ကျော်ဟိန်းနှင့်စန္ဒာ၏ နုနုငယ်ငယ်ရုပ်ရှင်ဇာတ်ကားတွင် သီဆိုကြသည်။ တက်္ကသိုလ်အေးမောင် ၊ ပီတာဘသိန်း၊ ဇော်ဝမ်းတို့မှစ၍  ဟေမာနေဝင်း၊ စိုးလွင်လွင်၊ အောင်ရင်၊ လေးလေးဝါး၊ အောင်နိုင်၊ ရိမ်မိုး၊ စိုးထက်၊ ဂျက်ဆန်ထွန်း၊ မရန်ဆိုင်းနော်တို့အထိ မဆလ၊ နဝတ၊ နအဖ၊ အရပ်သားအစိုးရအထိ ခေတ်အဆက်ဆက်သီဆိုလာခဲ့ကြသည်ကို တွေ့ရှိရသည်။ တေးသရုပ်ဖော်များကို မြစ်ဆုံမှသည် ရန်ကုန်၊ တိုင်းရင်းသားကျေးရွာ၊ Junction square အရှေ့ထိ ရိုက်ကူးခဲ့ကြသည်။ ကချင်ရိုးရာအကမှသည် ခေတ်ပေါ်အကမျိုးစုံဖြင့် တီထွင်ဆန်းသစ် ကပြခဲ့ကြသည်။

ဂျိမ်းဖောသီချင်းကို ဆက်လက်စူးစမ်းမည်ဆိုလျှင် ဂျပန်ခေတ်သို့ ပြန်သွားရမည်ဖြစ်သည်။ ထိုသို့ဆိုလျှင် ဂျိမ်းဖောသီချင်း၏ မူလဖန်တီးရှင် ဆရာဦးမျိုးမြင့်ဆွေအကြောင်းမှစကြရဦးမည်။ ဆရာဦးမျိုးမြင့်ဆွေသည် ပန်းချီဆရာ၊ ကဗျာဆရာ၊ စာရေးဆရာ၊ သီချင်းရေးသူအဖြစ် ဘဝတစ်လျှောက်လုံးအနုပညာကို ဖန်တီးခဲ့သူ အနုပညာရှင်ကြီးဖြစ်သည်။ ဆရာဦးမျိုးမြင့်ဆွေ(ပန်းချီဆရာကိုမြသောင်း)ကို ၁၉၃၃ ခုနှစ်တွင်  ရေဦးမြို့နယ်၊ မကျီးတောရွာတွင် မွေးဖွားခဲ့သည်။ မိဘများမှာ ကျောင်းဆရာကြီး ဦးအေးမောင်၊ ဒေါ်လေးငွေတို့ဖြစ်ကြပြီး အမည်ရင်းမှာ ဦးမြသောင်းဖြစ်သည်။ ကဗျာတို၊ ဝတ်္ထုတို၊ ဆောင်းပါးများအပြင် တေးသီချင်းများကို ရေးစပ်ခဲ့ရာ စေလိုရာစေရုပ်ရှင်ဇာတ်ကားတွင် ဇော်ဝမ်းသီဆိုသော ကျောက်ခဲ၊ သဇင်နှင့် နုနုငယ်ငယ် ရုပ်ရှင်ဇာတ်ကားတွင် ကျော်ဟိန်းသီဆိုသော ဂျိန်းဖောပွဲတော်သီချင်းမှာ ဂီတလောကတွင် အောင်မြင်ကျော်ကြားလူကြိုက်များခဲ့ သည်။ ဆရာ့၏အသက်မွေးဝမ်းကျောင်းမှာ  ပန်းချီဆရာဖြစ်သည်။ ပန်းချီဆရာ၊ ကဗျာဆရာ၊ ဂီတစာဆိုဘဝတွင် ကျင်လည်ရင်း ၁၉၉၀ ပြည့်နှစ်၊ ဖေဖော်ဝါရီ ၁၃ ရက်နေ့တွင် မန္တလေးမြို့၌ ကွယ်လွန်ခဲ့သည်။ ဆောင်းပါး၊ ဝတ္ထုတိုပေါင်း ၁၅၀ ကျော်၊ ကဗျာပေါင်းမှာ ၅၀၀ ကျော်၊ သီချင်းပေါင်း ၂၅၀ ကျော်၊ ရေဆေး၊ ဆီဆေး၊ ခဲမှုန် စသည့်ပန်းချီကားပေါင်း ၇၀၀ ကျော်ဖန်တီးခဲ့ပြီး မကွယ်လွန်မီတစ်ရက်အလိုတွင် အမည်မပေးလိုက်ရရှာသော ကဗျာတစ်ပုဒ်ကို ရေးဖွဲ့သွားခဲ့သေးသည်။ ဆရာမကြီးလူထုဒေါ်အမာက “ဆရာမြသောင်းဟာ အဲဒီလို ပန်းချီရယ်၊ စာရယ်၊ ကဗျာရယ် သုံးမျိုးစလုံးကို ခြယ်မှုန်းရေးဖွဲ့နေတဲ့ကြားထဲက ဂီတကိုလည်းသူက ဆုပ်ဆုပ်ကိုင်ကိုင် လုပ်လာပြန်တယ်။ အားနေလို့လုပ်တာတော့ ဟုတ်ဟန်မတူဘူး။ မအားဘဲနဲ့ဝါသနာပါလို့ လုပ်တာနဲ့ တူပါတယ်။ သူက အနုပညာပါရမီရှင်ပါကလား။ ဂီတကိုဆုပ်ကိုင်ပြီး သူ့သီချင်းလေးတွေက လူကြားထဲက ဘွားခနဲရောက်လာပါတယ်။ မင်းသားဇော်ဝမ်းဆိုသွားတဲ့ ကျောက်ခဲသီချင်း၊ မင်းသားကျော်ဟိန်းဆိုသွားတဲ့ ဂျိမ်းဖောပွဲတော်သီချင်းတို့ဆိုရင် ကလေးတွေ ပါးစပ်ဖျားကနေပြီး ကျွန်မတို့ဆီကိုတောင် ကူးစက်လာသေးတယ်”ဟု ဆိုခဲ့သည်။

ဆရာဦးမျိုးမြင့်ဆွေသည် လွတ်လပ်ရေးမရမီက ကချင်စစ်သားများနှင့် ရင်းနှီးကျွမ်းဝင်ခဲ့ပြီး ကချင်ရိုးရာယဉ်ကျေးမှုများနှင့် ထိတွေ့ခဲ့ရသည်။ ဆရာစိုးနိုင်(မန်္တလေးတက်္ကသိုလ်)က ““ဆရာဟာ ကချင်စာ၊ ကချင်စကား၊ ရှမ်းစာ၊ ရှမ်းစကား၊ ဟင်ဒူစတန်နီ၊ အင်္ဂလိပ်စကား၊ စာပေများကို ကောင်းကောင်းတတ်ပါတယ်။ ဒါကြောင့်ဆရာဟာ ဘယ်နေရာမှာဖြစ်ဖြစ် ကချင်တိုင်းရင်းသား တစ်ယောက်နဲ့တွေ့ပြီဆိုရင် ကချင်လိုကျွမ်းကျွမ်းကျင်ကျင် ပြောဆိုဆက်ဆံတတ်တော့  တစ်ဖက်က အံ့သြတာ၊ ဝမ်းသာတာ၊ ရင်းနှီးကျွမ်းဝင်ချစ်ခင်မှုရှိလာတာတွေဟာ မဆန်းလှပါဘူး”ဟု မှတ်တမ်းတင်ခဲ့သည်။

ထို့ကြောင့် ဆရာဦးမျိုးမြင့်ဆွေသည် –

ဂျိမ်းဖော်ပွဲတော်

““ဟိုရှေ့က ဆူဆူညံ ဘာသံလို့မေး…။

““နံပင်ခယင်”” အိုးစည်ဝိုင်းနဲ့ ဓားသိုင်းတဲ့လေး။

““ရှေ့ုပိုင်းက ခေါင်းပေါင်းဖြူ ဘယ်သူလဲမေး။””

“အကီဝါ” “ဆလန်”များနဲ့ “ဒူးဝါး”တဲ့လေ။

““အပန်းငဲ့ ပြေစရာ ဘယ်ဟာလဲတွေး…။

တောင်ခြေမှာ ခေါင်ရည်အိုးပေါ့

ရိုးရာကွယ့်လေး။

““မီးပုံကြီး ပတ်ပတ်ရံ

ဟန်ညီလှသေး…။

ဘယ်ယိုင်ကာ ညာနင်းမယ်

မင်းလိုက်ခဲ့လေး။

“လော့ခူး”ဆို ခေါင်တစ်ကြိုက်

တစ်ရှိုက်လောက်စုပ်ကာယူ။

ဂျိန်းဖောပျို နံ့သာတုံး

ရှုံးလိမ့်မြို့သူ

ပြွေနက်ကကျူ

လူသံက ဝေး လေး လေး…။

ခေါင်တန်ခိုးပေထင့်

မညှိုးပေါင်တခုန်ခုန်ပ

နေအရုဏ်

အောင်လံစိုက်စေတော့

ဆွေအစုံ တောင်ယံတဝှိုက်မှာ

“ဒေါင်မ-ရေ”…

က, လိုက်ချည့်သေး…။

ဟူသောကဗျာကို ဖွဲ့စပ်နိုင်ခဲ့လေသည်။ ထိုကဗျာသည် ၁၉၆၀ ခုနှစ်၊ ဇန်နဝါရီလတွင်ထုတ်ဝေသော ဆရာ့၏ပထမဆုံးကဗျာပေါင်းချုပ် မိုးသောက်ယံကဗျာစာအုပ်တွင် ပါဝင်ခဲ့သည်။ မျိုးချစ်စာဆိုဆရာကြီး သခင်ကိုယ်တော်မှိုင်းကို ရည်ညွန်းထုတ်ဝေခဲ့ခြင်းဖြစ်သည်။

ဆရာ့၏ကဗျာသည် အလွန်ကျော်ကြားလူကြိုက်များခဲ့ပြီး ၁၉၆၀ ကျော်မှ ၁၉၈၀ ကျော်ခန့်အထိ ၁၀ တန်းကျောင်းသုံး အထက်တန်းကဗျာလက်ရွေးစင်စာအုပ်တွင် ပြဌာန်းခြင်းခံခဲ့ရသည်။ ပညာရေးလောကတွင်သာမကပဲ ဂီတလော၊ ရုပ်ရှင်လောကအထိပါ ထိုးဖောက်နိုင်ခဲ့သည်။ ဆရာကြီးမောင်စွမ်းရည်က “ဂျိမ်းဖောပွဲတော်ကဗျာကို သီချင်းလုပ်ဆိုဖို့ ညီအစ်ကိုနှစ်ယောက်နဲ့ လူကြီးတစ်ယောက်လာဝယ်တယ်။ အဲဒီကဗျာက ၁၀ တန်းကျောင်းသုံး၊ အထက်တန်း ကဗျာလက်ရွေးစင်စာအုပ်ထဲမှာပါတယ်။ ကျောင်းသားပရိသတ် ကြိုက်ပြီးသားပေါ့။ အဲဒါကိုဆိုလိုက်ပြန်တော့လည်း ချက်ချင်းပျံ့နှံ့ကျော်ကြားသွားတယ်”ဟု အမှတ်ရခဲ့သည်။

ယခုအခါ ဂျိမ်းဖောပွဲတော်ကဗျာ၏သက်တမ်းမှာ နှစ်ပေါင်း ၆၀ နီးပါးရှိပြီဖြစ်သကဲ့သို့ ဂျိမ်းဖောပွဲတော်သီချင်းမှာလည်း နှစ်ပေါင်း ၅၀ နီးပါးခန့်ရှိပြီဖြစ်သည်။ နိုင်ငံကျော်အဆိုတော်ကြီးကေဂျာနူးက ဆရာကြီး၏ ဂျိမ်းဖောပွဲတော်ကဗျာသီချင်းသည် ကချင်ပြည်နယ်သားများ ကြိုက်နှစ်သက်သောသီချင်းဖြစ်သလို ပြည်နယ်အကြီးအကဲ၊ နိုင်ငံတော်အကြီးအကဲများကလည်း အလွန်နှစ်ခြိုက်သဘောကျသော သီချင်းကဗျာဖြစ်ပါသည်ဟု မှတ်ချက်ပြုခဲ့လေသည်။

(ဂျိမ်းဖောပွဲတော်ကဗျာကို သံစဉ်ထည့်ခဲ့သော တေးရေးဆရာ၊ အဆိုတော်တက်္ကသိုလ်အေးမောင်နှင့် တွေ့ဆုံမေးမြန်းနိုင်ရန် ကြိုးစားပါဦးမည်။)

ရည်ညွန်း – စာအုပ်နာမည်မှန်ထဲကသစ်္စာနှင့် အခြားကဗျာများ (မျိုးမြင့်ဆွေ)

ဂျိမ်းဖောပွဲတော် (စိုးနိုင်-မန္တလေးတက်္ကသိုလ်)လမ်းခင်းတဲ့ကျောက်ခဲ (မောင်စွမ်းရည်)

LEAVE A REPLY

Please enter your comment!
Please enter your name here